har taraf se nazron ka war qatilana hai

har taraf se nazroñ kā vaar qātilāna hai

ik taraf akelā dil ik taraf zamāna hai

ḳhud Dubo ke kashtī ko ġham kī tah ko paanā hai

zindagī kī TuuTī naav ghaaT se lagānā hai

tez-rau havāoñ meñ ik charāġh-e-hasrat huuñ

jin kī har adā qātil un se dostāna hai

dekh le nazar bhar kar barq kī nahīñ himmat

vaqt kī nigāhoñ meñ merā āshiyāna hai

pā ke chhoḌ duuñ kyūñkar DhūñDtā phirūñ har-sū

tū to Thahrā harjā.ī terā kyā Thikāna hai

le ke laash hastī kī tum kaho kidhar jā.ūñ

haath meñ muqaddar ke ab to tāziyāna hai

tarse hoñT Duube haiñ sāġhar-e-mohabbat meñ

zahr ho ki amrit ho pyaas to bujhānā hai

kaash maiñ 'munīr' un se is qadar to keh saktā

aap se mohabbat hai aur vālihāna hai

har taraf se nazron ka war qatilana hai

ek taraf akela dil ek taraf zamana hai

KHud Dubo ke kashti ko gham ki tah ko pana hai

zindagi ki TuTi naw ghaT se lagana hai

tez-rau hawaon mein ek charagh-e-hasrat hun

jin ki har ada qatil un se dostana hai

dekh le nazar bhar kar barq ki nahin himmat

waqt ki nigahon mein mera aashiyana hai

pa ke chhoD dun kyunkar DhunDta phirun har-su

tu to Thahra harjai tera kya Thikana hai

le ke lash hasti ki tum kaho kidhar jaun

hath mein muqaddar ke ab to taziyana hai

tarse honT Dube hain saghar-e-mohabbat mein

zahr ho ki amrit ho pyas to bujhana hai

kash main 'munir' un se is qadar to keh sakta

aap se mohabbat hai aur walihana hai