فکر غم دوراں پر تاباںؔ سوز غم جاناں اور سہی

فکر غم دوراں پر تاباںؔ سوز غم جاناں اور سہی

بربادیٔ جسم و جاں کے لیے کچھ صورت و ساماں اور سہی

لیلائے وطن تیری خاطر کچھ جیب و گریباں چاک ہوئے

اے جان تمنا تیرے لیے دامان و گریباں اور سہی

پھر ساز چھڑے جھنکار تو ہو نغمے نہ سہی کہرام تو ہو

مضراب الم کی ضرب مسلسل تار رگ جاں اور سہی

مل جائے جنوں کو جولانی یا عقل کرے پھر من مانی

گر وسعت صحرا اور نہیں پھر تنگیٔ زنداں اور سہی

چاہیں گے تو باغ عالم کا ہر نظم بدل کر رکھ دیں گے

آئین چمن ایسا نہ ہوا دستور گلستاں اور سہی

اے اہل خرد کچھ روز ابھی جو چاہے کہو جو چاہے کرو

پامالیٔ انساں اور سہی ہاں اور سہی ہاں اور سہی

چھوٹے غم دوراں سے تاباںؔ لیکن غم جاناں سے نہ بچے

افسانۂ غم ایسا نہ ہوا دکھ درد کے عنواں اور سہی