fikr-e-gham-e-dauran par taban soz-e-gham-e-jaanan aur sahi

fikr-e-ġham-e-daurāñ par 'tābāñ' soz-e-ġham-e-jānāñ aur sahī

barbādī-e-jism-o-jāñ ke liye kuchh sūrat-o-sāmāñ aur sahī

lailā-e-vatan terī ḳhātir kuchh jaib-o-garebāñ chaak hue

ai jān-e-tamannā tere liye dāmān-o-girebāñ aur sahī

phir saaz chhiḌe jhankār to ho naġhme na sahī kohrām to ho

mizrāb-e-alam kī zarb-e-musalsal tār-e-rag-e-jāñ aur sahī

mil jaa.e junūñ ko jaulānī yā 'aql kare phir man-mānī

gar vus'at-e-sahrā aur nahīñ phir tangī-e-zindāñ aur sahī

chāheñge to bāġh-e-'ālam kā har nazm badal kar rakh deñge

ā.īn-e-chaman aisā na huā dastūr-e-gulistāñ aur sahī

ai ahl-e-ḳhirad kuchh roz abhī jo chāhe kaho jo chāhe karo

pāmālī-e-insāñ aur sahī haañ aur sahī haañ aur sahī

chhūTe ġham-e-daurāñ se 'tābāñ' lekin ġham-e-jānāñ se na bache

afsāna-e-ġham aisā na huā dukh dard ke 'unvāñ aur sahī

fikr-e-gham-e-dauran par 'taban' soz-e-gham-e-jaanan aur sahi

barbaadi-e-jism-o-jaan ke liye kuchh surat-o-saman aur sahi

laila-e-watan teri KHatir kuchh jaib-o-gareban chaak hue

ai jaan-e-tamanna tere liye daman-o-gireban aur sahi

phir saz chhiDe jhankar to ho naghme na sahi kohram to ho

mizrab-e-alam ki zarb-e-musalsal tar-e-rag-e-jaan aur sahi

mil jae junun ko jaulani ya 'aql kare phir man-mani

gar wus'at-e-sahra aur nahin phir tangi-e-zindan aur sahi

chahenge to bagh-e-'alam ka har nazm badal kar rakh denge

aain-e-chaman aisa na hua dastur-e-gulistan aur sahi

ai ahl-e-KHirad kuchh roz abhi jo chahe kaho jo chahe karo

pamali-e-insan aur sahi han aur sahi han aur sahi

chhuTe gham-e-dauran se 'taban' lekin gham-e-jaanan se na bache

afsana-e-gham aisa na hua dukh dard ke 'unwan aur sahi