mohabbat hogi mohtaj-e-bayan jab hum nahin honge

mohabbat hogī mohtāj-e-bayāñ jab ham nahīñ hoñge

na samjhegā koī dil kī zabāñ jab ham nahīñ hoñge

hamārī uñgliyāñ haiñ nabz-e-ehsāsāt-e-imkāñ par

yaqīñ par vahm kā hogā gumāñ jab ham nahīñ hoñge

abhī to sab ne gard-e-kārvāñ hī ham ko samjhā hai

hameñ DhūñDeñge ahl-e-kārvāñ jab ham nahīñ hoñge

nishāñ manzil kā kyā manzil bhī gum hogī dhuñdalkoñ meñ

charāġh-e-rah-guzar deñge dhuāñ jab ham nahīñ hoñge

vatan ke chappe chappe par kuchh aisī yādgāreñ haiñ

hamārī dāstāñ hogī yahāñ jab ham nahīñ hoñge

mohabbat ke hasīñ ḳhvāboñ kī tā'bīreñ hamīñ tak haiñ

bahut se ḳhvāb hoñge rā.egāñ jab ham nahīñ hoñge

hameñ barbād karne se ye pahle sochnā hogā

tumhī par to uTheñgī ungliyāñ jab ham nahīñ hoñge

hamārī ḳhāmushī ko apnī had se to guzarne do

banegī be-zabānī bhī zabāñ jab ham nahīñ hoñge

chhiḌak kar ḳhūn-e-dil ham ne gulistāñ ko nikhārā hai

hameñ ro.egā barsoñ bāġhbāñ jab ham nahīñ hoñge

hamāre baa'd aksar dā’vat-e-fikr-o-nazar deñgī

hamāre zehn kī parchhā.iyāñ jab ham nahīñ hoñge

hamīñ par ḳhatm hai ai 'josh' shiddat barq-o-bārāñ kī

na hogā inqilāb-e-āsmāñ jab ham nahīñ hoñge

mohabbat hogi mohtaj-e-bayan jab hum nahin honge

na samjhega koi dil ki zaban jab hum nahin honge

hamari ungliyan hain nabz-e-ehsasat-e-imkan par

yaqin par wahm ka hoga guman jab hum nahin honge

abhi to sab ne gard-e-karwan hi hum ko samjha hai

hamein DhunDenge ahl-e-karwan jab hum nahin honge

nishan manzil ka kya manzil bhi gum hogi dhundalkon mein

charagh-e-rah-guzar denge dhuan jab hum nahin honge

watan ke chappe chappe par kuchh aisi yaadgaren hain

hamari dastan hogi yahan jab hum nahin honge

mohabbat ke hasin KHwabon ki ta'biren hamin tak hain

bahut se KHwab honge raegan jab hum nahin honge

hamein barbaad karne se ye pahle sochna hoga

tumhi par to uThengi ungliyan jab hum nahin honge

hamari KHamushi ko apni had se to guzarne do

banegi be-zabani bhi zaban jab hum nahin honge

chhiDak kar KHun-e-dil hum ne gulistan ko nikhaara hai

hamein roega barson baghban jab hum nahin honge

hamare ba'd aksar da’wat-e-fikr-o-nazar dengi

hamare zehn ki parchhaiyan jab hum nahin honge

hamin par KHatm hai ai 'josh' shiddat barq-o-baran ki

na hoga inqilab-e-asman jab hum nahin honge