buri taqdir ho meri magar itni buri kyun ho

burī taqdīr ho merī magar itnī burī kyuuñ ho

jise maiñ dil se chāhūñ jaan kā dushman vahī kyuuñ ho

kiyā jab rashk kā shikvā to bole dil ko samjhāo

agar dil mere bas meñ ho to phir ye baat hī kyuuñ ho

vafā tum ko nahīñ aatī vafā to maiñ nahīñ kahtā

jafā.eñ to kiye jaao jafāoñ meñ kamī kyuuñ ho

kahā jab maiñ ne kyā ho tum agar ho mere pahlū meñ

to bole vo ghaḌī kyuuñ aa.e aisī baat hī kyuuñ ho

mujhe 'āshiq na samjho ḳhud-ġharaz samjho burā samjho

ye sab kuchh ho magar aġhyār ke sar munsifī kyuuñ ho

mukāfāt-e-sitam par dilbaro dil meñ ye hujjat hai

vo kahtā hai abhī kyuuñ ho ye kahtā hai kabhī kyuuñ ho

faqat mere dikhāne ko ḳhafā hote haiñ dushman se

agar dil meñ kudūrat ho to hoñToñ par hañsī kyuuñ ho

'qamar' maut aa.e lekin kūcha-e-jānāñ meñ kyuuñ aa.e

hamāre naam se bad-nām qātil kī galī kyuuñ ho

buri taqdir ho meri magar itni buri kyun ho

jise main dil se chahun jaan ka dushman wahi kyun ho

kiya jab rashk ka shikwa to bole dil ko samjhao

agar dil mere bas mein ho to phir ye baat hi kyun ho

wafa tum ko nahin aati wafa to main nahin kahta

jafaen to kiye jao jafaon mein kami kyun ho

kaha jab main ne kya ho tum agar ho mere pahlu mein

to bole wo ghaDi kyun aae aisi baat hi kyun ho

mujhe 'ashiq na samjho KHud-gharaz samjho bura samjho

ye sab kuchh ho magar aghyar ke sar munsifi kyun ho

mukafat-e-sitam par dilbaro dil mein ye hujjat hai

wo kahta hai abhi kyun ho ye kahta hai kabhi kyun ho

faqat mere dikhane ko KHafa hote hain dushman se

agar dil mein kudurat ho to honTon par hansi kyun ho

'qamar' maut aae lekin kucha-e-jaanan mein kyun aae

hamare nam se bad-nam qatil ki gali kyun ho