roz ek naya suraj hai teri ataon mein

roz ik nayā sūraj hai tirī 'atāoñ meñ

e'timād baḌhtā hai sub.h kī ziyāoñ meñ

shāyad un dayāroñ meñ ḳhush-dilī bhī daulat hai

ham to muskurāte hī ghir gaye gadāoñ meñ

phūltī hai ab sarsoñ dulhanoñ ke hāthoñ par

kis sadī meñ hote the rang bhī hināoñ meñ

bhā.iyoñ ke jamghaT meñ be-ridā huiiñ bahneñ

aur sar nahīñ chhupte maaoñ kī du'āoñ meñ

bārisheñ to yāroñ ne kab kī bech Daalī haiñ

ab to ḳhaak uḌtī hai har taraf havāoñ meñ

suunī suunī galiyāñ haiñ ujḌī ujḌī chaupāleñ

jaise koī ādam-ḳhor phir gayā ho gaaoñ meñ

jab kisān khetoñ meñ dopahar ko jalte haiñ

loTte haiñ sag-zāde kīkaroñ kī chhāoñ meñ

tum hamāre bhaa.ī ho bas zarā sī duurī hai

ham fasīl ke bāhar tum mahal-sarāoñ meñ

un ke dāmanoñ se bhī ḳhuun risne lagtā hai

zaḳhm chhup nahīñ sakte reshmī ridāoñ meñ

dostī ke parde meñ dushmanī huī itnī

rah gaye faqat dushman apne āshnāoñ meñ

aur jang kyā hogī jab ki naḳhl zaitūñ kā

shāḳh shāḳh baTtā hai bhūkī fāḳhtāoñ meñ

ek be-gunah kā ḳhuun ġham jagā gayā kitne

baT gayā hai ik beTā be-shumār maaoñ meñ

be-vaqār āzādī ham ġharīb mulkoñ kī

taaj sar pe rakkhā hai beḌiyāñ haiñ paaoñ meñ

ḳhaak se judā ho kar apnā vazn kho baiThā

aadmī mu'allaq sā rah gayā ḳhalāoñ meñ

ab 'nadīm' manzil ko reza reza chuntā hai

ghir gayā thā be-chāra kitne rahnumāoñ meñ

roz ek naya suraj hai teri 'ataon mein

e'timad baDhta hai subh ki ziyaon mein

shayad un dayaron mein KHush-dili bhi daulat hai

hum to muskuraate hi ghir gaye gadaon mein

phulti hai ab sarson dulhanon ke hathon par

kis sadi mein hote the rang bhi hinaon mein

bhaiyon ke jamghaT mein be-rida huin bahnen

aur sar nahin chhupte maon ki du'aon mein

barishen to yaron ne kab ki bech Dali hain

ab to KHak uDti hai har taraf hawaon mein

suni suni galiyan hain ujDi ujDi chaupalen

jaise koi aadam-KHor phir gaya ho gaon mein

jab kisan kheton mein dopahar ko jalte hain

loTte hain sag-zade kikaron ki chhaon mein

tum hamare bhai ho bas zara si duri hai

hum fasil ke bahar tum mahal-saraon mein

un ke damanon se bhi KHun risne lagta hai

zaKHm chhup nahin sakte reshmi ridaon mein

dosti ke parde mein dushmani hui itni

rah gaye faqat dushman apne aashnaon mein

aur jang kya hogi jab ki naKHl zaitun ka

shaKH shaKH baTta hai bhuki faKHtaon mein

ek be-gunah ka KHun gham jaga gaya kitne

baT gaya hai ek beTa be-shumar maon mein

be-waqar aazadi hum gharib mulkon ki

taj sar pe rakkha hai beDiyan hain paon mein

KHak se juda ho kar apna wazn kho baiTha

aadmi mu'allaq sa rah gaya KHalaon mein

ab 'nadim' manzil ko reza reza chunta hai

ghir gaya tha be-chaara kitne rahnumaon mein