لوٹ کر وہ بھی گھر گیا ہوگا

لوٹ کر وہ بھی گھر گیا ہوگا

اب تو پانی اتر گیا ہوگا

پانی پانی جو ہو رہا ہے وہ

پانی سر سے گزر گیا ہوگا

وسعت قلب کب تلک لیکن

دل ہے آخر کو بھر گیا ہوگا

خوف میں مبتلا جئے کیسے

ڈر گیا تھا وہ مر گیا ہوگا

لوگ اب تک اسے نہیں بھولے

کام کچھ ایسا کر گیا ہوگا

سب ہے اس کا کیا دھرا پر وہ

مجھ پہ الزام دھر گیا ہوگا

دوست مصروف ہیں سبھی اس کے

سوچتا ہوں کدھر گیا ہوگا

گزرا ہوگا نظر جھکا کے وہ

اس گلی میں مگر گیا ہوگا

اپنے گھر میں سنا ہے خوش ہے وہ

اور بھی کچھ نکھر گیا ہوگا