na milao humse aankhen koi tir chal na jae

na milāo ham se āñkheñ koī tiir chal na jaa.e

kahīñ saath hasratoñ ke mirā dam nikal na jaa.e

mire dil meñ rahne vaale zarā hoshiyār rahnā

tire ruḳh kī tābishoñ se ye makān jal na jaa.e

huī sub.h rote rote tū ḳhudā-rā ab to aa jā

kahīñ bahte āñsuoñ meñ ye hayāt Dhal na jaa.e

mirī shā'irī salāmat mirī ḳhāmushī mubārak

tirī ik nazar se lekin ye samāñ badal na jaa.e

vo 'munīr' vasl kī shab yahī keh rahe haiñ paiham

kahīñ chhup na jaa.eñ taare kahīñ raat Dhal na jaa.e

na milao hum se aankhen koi tir chal na jae

kahin sath hasraton ke mera dam nikal na jae

mere dil mein rahne wale zara hoshiyar rahna

tere ruKH ki tabishon se ye makan jal na jae

hui subh rote rote tu KHuda-ra ab to aa ja

kahin bahte aansuon mein ye hayat Dhal na jae

meri sha'iri salamat meri KHamushi mubarak

teri ek nazar se lekin ye saman badal na jae

wo 'munir' wasl ki shab yahi keh rahe hain paiham

kahin chhup na jaen tare kahin raat Dhal na jae