hai munawwar shab ki tariki mein ek tara kahin

hai munavvar shab kī tārīkī meñ ik taarā kahīñ

hai yaqīñ mil jā.egā ham ko vo dobārā kahīñ

muzmahil jab āsmāñ ke saare taare ho ga.e

kaise chamkegā bhalā ab koī sayyāra kahīñ

haiñ jo dil par hasratoñ kī aur ġhamoñ kī gaThriyāñ

mar na jaa.e Dhote Dhote bojh be-chāra kahīñ

gar havā bharnī hai bhariye aap lekin soch kar

muñh pe phaT jaa.e na ye lālach kā ġhubbāra kahīñ

de sukūñ dil ko zarā jo qalb ko de soz bhī

jaane kyuuñ miltā nahīñ ab aisā nazzāra kahīñ

hai yahāñ par kaun us sā dekhiye shīrīñ-suḳhan

mil nahīñ saktā koī 'farhān' sā pyārā kahīñ

hai munawwar shab ki tariki mein ek tara kahin

hai yaqin mil jaega hum ko wo dobara kahin

muzmahil jab aasman ke sare tare ho gae

kaise chamkega bhala ab koi sayyara kahin

hain jo dil par hasraton ki aur ghamon ki gaThriyan

mar na jae Dhote Dhote bojh be-chaara kahin

gar hawa bharni hai bhariye aap lekin soch kar

munh pe phaT jae na ye lalach ka ghubbara kahin

de sukun dil ko zara jo qalb ko de soz bhi

jaane kyun milta nahin ab aisa nazzara kahin

hai yahan par kaun us sa dekhiye shirin-suKHan

mil nahin sakta koi 'farhan' sa pyara kahin