ziyaada kam ka kahan wo hisab rakhta hai

ziyāda kam kā kahāñ vo hisāb rakhtā hai

ujālā sab ke liye māhtāb rakhtā hai

vo dekh letā hai har shai ko apnī āñkhoñ se

aur apne husn ko zer-e-naqāb rakhtā hai

jo ḳhat ko paḌh lo mo'attar dimāġh ho jaa.e

vo harf harf meñ bū-e-gulāb rakhtā hai

ye aur baat hai ḳhāmosh hai vo maslahatan

jo har savāl kā achchhā javāb rakhtā hai

tum us ke ranj ko kis tarh jaan pāoge

sajā ke ruḳh pe jo dil kī kitāb rakhtā hai

baġhair us kī ijāzat ke chhū nahīñ sakte

vo daane daane kā apne hisāb rakhtā hai

usī ko miltī hai tā'bīr-e-nau kī shādābī

jo apnī āñkhoñ meñ ḳhush-rang ḳhvāb rakhtā hai

koī shumār nahīñ us kā is zamāne meñ

jo guftugū meñ 'zafar' jī janāb rakhtā hai

ziyaada kam ka kahan wo hisab rakhta hai

ujala sab ke liye mahtab rakhta hai

wo dekh leta hai har shai ko apni aankhon se

aur apne husn ko zer-e-naqab rakhta hai

jo KHat ko paDh lo mo'attar dimagh ho jae

wo harf harf mein bu-e-gulab rakhta hai

ye aur baat hai KHamosh hai wo maslahatan

jo har sawal ka achchha jawab rakhta hai

tum us ke ranj ko kis tarh jaan paoge

saja ke ruKH pe jo dil ki kitab rakhta hai

baghair us ki ijazat ke chhu nahin sakte

wo dane dane ka apne hisab rakhta hai

usi ko milti hai ta'bir-e-nau ki shadabi

jo apni aankhon mein KHush-rang KHwab rakhta hai

koi shumar nahin us ka is zamane mein

jo guftugu mein 'zafar' ji janab rakhta hai