مطلوب زندگی کو ابھی امتحاں نہیں

مطلوب زندگی کو ابھی امتحاں نہیں

اب تک متاع درد سے دل بدگماں نہیں

جو برگ خشک تند ہواؤں کی زد پہ تھا

وہ آشنائے راز کہاں ہے کہاں نہیں

لہجے کی دھار دل میں اترتی چلی گئی

یہ ان کی بات ہے جو کبھی سرگراں نہیں

دیکھو تو ہر جبیں پہ ہے اک آشنا سی دھوپ

سوچو تو آس پاس کوئی راز داں نہیں

چہروں کا رنگ دیکھ نگاہوں کی بات سن

وہ بے زباں نہیں جو ترے ہم زباں نہیں

ہر لمحہ اک صدی سا گزرتا ہے دوستو

دل کو شکایت نفس رائیگاں نہیں

خاموشیوں کی دھند میں گھٹنے لگا ہے دم

شب کا سفر طویل ہے افسانہ خواں نہیں

دیوار شب وہی ہے جمال سحر وہی

شیشے نہیں رہے ہیں کہ سنگ گراں نہیں

ہم سے ہی کب نگاہ اٹھائی گئی اداؔ

ورنہ غبار شام الم بے کراں نہیں