دل کے ماتم میں اگر میں سوئے دریا دیکھتا

دل کے ماتم میں اگر میں سوئے دریا دیکھتا

موج کی بکھری ہوئی زلف چلیپا دیکھتا

التہاب اتنا تپ غم کا مجھے کرتا بلند

نبض میری بام گردوں پر مسیحا دیکھتا

شکر کرتا ہوں کہ سونپا خاک میں عریاں بدن

کیا قلق ہوتا کفن جس روز میلا دیکھتا

زندہ بے اسبابئ دنیا سے ہوں اے دور چرخ

مر گیا ہوتا کفن جس دن مہیا دیکھتا

ہجر میں بالیں پہ اے دل موت ہی آ بیٹھتی

کوئی تو میرے تڑپنے کا تماشا دیکھتا

ان کی مرضی تھی کہ خوش ہوتا جلا کے دل کو میں

پھونکتا خود اپنے دل کو خود تماشا دیکھتا

شام ہوتے پڑ رہا زنجیر در کی کر کے بند

آنے والا کون تھا کس کا میں رستہ دیکھتا