aatish-e-gham ko KHalish rahti na pairahan ke sath

ātish-e-ġham ko ḳhalish rahtī na pairāhan ke saath

jal gayā hotā garebān-e-qabā dāman ke saath

saḳht mushkil yak-dilī ai dost hai dushman ke saath

sang hotā maiñ to rakhtā rābta aahan ke saath

marg kā ġham roz-e-ḳhilqat se hai jān-o-tan ke saath

kisht se aa.ī hai ye barq-e-fuġhāñ ḳhirman ke saath

kyuuñ nazar aate nahīñ piirī meñ yā-rab dil ke daaġh

ye chaman bhī kyā ḳhizāñ meñ luT gayā gulshan ke saath

girya-e-maulūd detā hai ḳhabar us ramz kī

ḳhūn-e-dil bhī hai charāġh-e-‘umr meñ roġhan ke saath

dostoñ ke saath tū ehsāñ meñ kartā hai qusūr

mard nekī meñ kamī karte nahīñ dushman ke saath

soz-e-ġham se dil ke jalne kā agar aa.e ḳhayāl

sā'iqa kī bad-sulūkī yaad kar ḳhirman ke saath

tund-ḳhūī ke sabab se ho ga.e sho'le fanā

rah gayā dūd-e-siyah lipTā huā gulḳhan ke saath

barq ban kar sāya-e-dīvār ham par kyuuñ girā

koī gustāḳhī na kī thī aañkh ne rauzan ke saath

zindagānī meñ tabī'at thī jo tanhā.ī-pasand

kis qadar mānūs merā dil huā madfan ke saath

dostoñ kā ai zamīn-e-qabr kyā shikva karūñ

jaan merī jab na aa.e tere ghar meñ tan ke saath

duuñ mah-o-ḳhurshīd se tamsīl koī baat hai

un ko nisbat kyā tumhāre 'āriz-e-raushan ke saath

shart-e-avval istijābat meñ hai iz'ān-e-du'ā

kyuuñ uThātā hai du'ā ko haath sū-e-zan ke saath

manzil-e-tāsīr tak mumkin nahīñ hargiz vasūl

shūmī-e-qismat hai saaye kī tarah shevan ke saath

zab.h mujh ko haath rakh kar mere siine par karo

kām-e-jāñ hāsil kare dil bhī rag-e-gardan ke saath

shukr hai vo turk-tāzī ko to aa.e qabr par

ham na lipTe ḳhaak hī lipTī sum-e-tausan ke saath

qurb-e-mard-e-be-haqīqat se ġhanī ko naf' kyā

ek hai honā na honā muur kā ḳhirman ke saath

aur ab kyā hoñge nāzuk vo misī mālīda lab

'aql kī mīzāñ meñ tulte haiñ gul-e-sausan ke saath

kyā samajhtā hai nigāh-e-yār ke nāvak ko tū

toḌtā hai ustuḳhāñ siine ke ye joshan ke saath

tāzgī meñ lāla-o-gul se bhī nikle kuchh fuzūñ

dil ke dāġhoñ kā jab andāza kiyā gulshan ke saath

aañkh vo rahtī nahīñ bā'd-az-husūl-e-kām-e-dil

kaid hai mardoñ kā iz.hār-e-mohabbat zan ke saath

ab to āñkheñ pīr-e-kan'āñ kī khuleñgī ai nasīm

bū-e-yūsuf misr se jaatī hai pairāhan ke saath

dekhne kā hai tamāsha sham' kā fānūs meñ

tan kī 'uryānī huī hai jam' pairāhan ke saath

kyuuñ kareñ yūsuf zuleḳhā kī shikāyat kā malāl

chaak hai iz.hār-e-'ismat ke liye dāman ke saath

kyuuñ na zer-e-ḳhāk tābinda hoñ mere dāġh-e-dil

thā mohabbat kā ta'alluq kis ruḳh-e-raushan ke saath

kyā abhī dete haiñ bū siine ke andar dil ke daaġh

nuur ye kaisā hai yā-rab zulmat-e-madfan ke saath

raushnī sahrā meñ kī hai muntazir baiThe haiñ ḳhud

ye mohabbat rah-navard-e-vādī-e-aiman ke saath

jāda-e-ajdād par 'kāmil' munāsib hai sulūk

āshtī un kī tarah karte raho dushman ke saath

aatish-e-gham ko KHalish rahti na pairahan ke sath

jal gaya hota gareban-e-qaba daman ke sath

saKHt mushkil yak-dili ai dost hai dushman ke sath

sang hota main to rakhta rabta aahan ke sath

marg ka gham roz-e-KHilqat se hai jaan-o-tan ke sath

kisht se aai hai ye barq-e-fughan KHirman ke sath

kyun nazar aate nahin piri mein ya-rab dil ke dagh

ye chaman bhi kya KHizan mein luT gaya gulshan ke sath

girya-e-maulud deta hai KHabar us ramz ki

KHun-e-dil bhi hai charagh-e-‘umr mein roghan ke sath

doston ke sath tu ehsan mein karta hai qusur

mard neki mein kami karte nahin dushman ke sath

soz-e-gham se dil ke jalne ka agar aae KHayal

sa'iqa ki bad-suluki yaad kar KHirman ke sath

tund-KHui ke sabab se ho gae sho'le fana

rah gaya dud-e-siyah lipTa hua gulKHan ke sath

barq ban kar saya-e-diwar hum par kyun gira

koi gustaKHi na ki thi aankh ne rauzan ke sath

zindagani mein tabi'at thi jo tanhai-pasand

kis qadar manus mera dil hua madfan ke sath

doston ka ai zamin-e-qabr kya shikwa karun

jaan meri jab na aae tere ghar mein tan ke sath

dun mah-o-KHurshid se tamsil koi baat hai

un ko nisbat kya tumhaare 'ariz-e-raushan ke sath

shart-e-awwal istijabat mein hai iz'an-e-du'a

kyun uThata hai du'a ko hath su-e-zan ke sath

manzil-e-tasir tak mumkin nahin hargiz wasul

shumi-e-qismat hai saye ki tarah shewan ke sath

zabh mujh ko hath rakh kar mere sine par karo

kaam-e-jaan hasil kare dil bhi rag-e-gardan ke sath

shukr hai wo turk-tazi ko to aae qabr par

hum na lipTe KHak hi lipTi sum-e-tausan ke sath

qurb-e-mard-e-be-haqiqat se ghani ko naf' kya

ek hai hona na hona mur ka KHirman ke sath

aur ab kya honge nazuk wo misi malida lab

'aql ki mizan mein tulte hain gul-e-sausan ke sath

kya samajhta hai nigah-e-yar ke nawak ko tu

toDta hai ustuKHan sine ke ye joshan ke sath

tazgi mein lala-o-gul se bhi nikle kuchh fuzun

dil ke daghon ka jab andaza kiya gulshan ke sath

aankh wo rahti nahin ba'd-az-husul-e-kaam-e-dil

kaid hai mardon ka izhaar-e-mohabbat zan ke sath

ab to aankhen pir-e-kan'an ki khulengi ai nasim

bu-e-yusuf misr se jati hai pairahan ke sath

dekhne ka hai tamasha sham' ka fanus mein

tan ki 'uryani hui hai jam' pairahan ke sath

kyun karen yusuf zuleKHa ki shikayat ka malal

chaak hai izhaar-e-'ismat ke liye daman ke sath

kyun na zer-e-KHak tabinda hon mere dagh-e-dil

tha mohabbat ka ta'alluq kis ruKH-e-raushan ke sath

kya abhi dete hain bu sine ke andar dil ke dagh

nur ye kaisa hai ya-rab zulmat-e-madfan ke sath

raushni sahra mein ki hai muntazir baiThe hain KHud

ye mohabbat rah-naward-e-wadi-e-aiman ke sath

jada-e-ajdad par 'kaamil' munasib hai suluk

aashti un ki tarah karte raho dushman ke sath