بہت حسیں ہے یہ پہلو بھی بے رخی کی طرح

بہت حسیں ہے یہ پہلو بھی بے رخی کی طرح

کبھی کبھی جو وہ ملتے ہیں اجنبی کی طرح

گئے تھے دیکھنے ان کو مگر نہ دیکھ سکے

گزر گئے وہ نگاہوں سے روشنی کی طرح

ہم آج تک نہ یہ سمجھے کہ التفات ان کا

اجل کی طرح حسیں ہے کہ زندگی کی طرح

اس اک ادائے محبت پہ زندگی صدقے

گریز ہم سے ہے لیکن سپردگی کی طرح

ادائے جور کی یکسانیت کو کیا کہیے

ستا رہا ہے زمانہ بھی آپ ہی کی طرح

کدھر نہ جائیں کدھر جائیں رہروان سحر

چمک رہا ہے اندھیرا بھی روشنی کی طرح

بہت بلند ہے محلوں سے خانۂ مفلس

یہاں تو دھوپ بھی آتی ہے چاندنی کی طرح

یہ کم نہیں ہے کہ بخشا ہے اس نے اے شاعرؔ

وہ التفات کہ نازک ہے برہمی کی طرح