bahut hasin hai ye pahlu bhi be-ruKHi ki tarah

bahut hasīñ hai ye pahlū bhī be-ruḳhī kī tarah

kabhī kabhī jo vo milte haiñ ajnabī kī tarah

ga.e the dekhne un ko magar na dekh sake

guzar ga.e vo nigāhoñ se raushnī kī tarah

ham aaj tak na ye samjhe ki iltifāt un kā

ajal kī tarh hasīñ hai ki zindagī kī tarah

is ik adā-e-mohabbat pe zindagī sadqe

gurez ham se hai lekin supurdagī kī tarah

adā-e-jaur kī yaksāniyat ko kyā kahiye

satā rahā hai zamāna bhī aap hī kī tarah

kidhar na jaa.eñ kidhar jaa.eñ rahravān-e-sahar

chamak rahā hai añdherā bhī raushnī kī tarah

bahut buland hai mahloñ se ḳhāna-e-muflis

yahāñ to dhuup bhī aatī hai chāñdnī kī tarah

ye kam nahīñ hai ki baḳhshā hai us ne ai 'shā'ir'

vo iltifāt ki nāzuk hai barhamī kī tarah

bahut hasin hai ye pahlu bhi be-ruKHi ki tarah

kabhi kabhi jo wo milte hain ajnabi ki tarah

gae the dekhne un ko magar na dekh sake

guzar gae wo nigahon se raushni ki tarah

hum aaj tak na ye samjhe ki iltifat un ka

ajal ki tarh hasin hai ki zindagi ki tarah

is ek ada-e-mohabbat pe zindagi sadqe

gurez hum se hai lekin supurdagi ki tarah

ada-e-jaur ki yaksaniyat ko kya kahiye

sata raha hai zamana bhi aap hi ki tarah

kidhar na jaen kidhar jaen rahrawan-e-sahar

chamak raha hai andhera bhi raushni ki tarah

bahut buland hai mahlon se KHana-e-muflis

yahan to dhup bhi aati hai chandni ki tarah

ye kam nahin hai ki baKHsha hai us ne ai 'sha'ir'

wo iltifat ki nazuk hai barhami ki tarah