uDti hui aawaz ke arman ki tarah tha

uḌtī huī āvāz ke armāñ kī tarah thā

vo naqsh ki miT kar bhī numāyāñ kī tarah thā

sūraj meñ numāyāñ huā zarra thā har ik shaḳhs

kahte haiñ kabhī shahr-e-bayābāñ kī tarah thā

chinghāḌtī chillātī huī sabz havā meñ

ik raaz utarte hue tūfāñ kī tarah thā

mausam ke mazāfāt pe barsā hai vahī abr

jo sar meñ mire dūd-e-pareshāñ kī tarah thā

thiiñ chāroñ taraf dhuup kī dushvār fasīleñ

yuuñ mere liye dasht bhī zindāñ kī tarah thā

āñkhoñ kī chamak thī ki bikharte hue patte

kuchh ḳhvāb-e-ḳhizāñ matla'-e-mizhgāñ kī tarah thā

'uryāñ ke aqab-zār ko jaatā huā jangal

mushkil to bahut thā magar āsāñ kī tarah thā

ā.īna-e-āshob meñ dhuñdlāyā huā 'aks

'unvāñ kī tarah thā kabhī imkāñ kī tarah thā

raushan thā 'zafar' vast meñ mahtāb-e-mulāqāt

maiñ chāroñ taraf hāla-e-hijrāñ kī tarah thā

uDti hui aawaz ke arman ki tarah tha

wo naqsh ki miT kar bhi numayan ki tarah tha

suraj mein numayan hua zarra tha har ek shaKHs

kahte hain kabhi shahr-e-bayaban ki tarah tha

chinghaDti chillati hui sabz hawa mein

ek raaz utarte hue tufan ki tarah tha

mausam ke mazafat pe barsa hai wahi abr

jo sar mein mere dud-e-pareshan ki tarah tha

thin chaaron taraf dhup ki dushwar fasilen

yun mere liye dasht bhi zindan ki tarah tha

aankhon ki chamak thi ki bikharte hue patte

kuchh KHwab-e-KHizan matla'-e-mizhgan ki tarah tha

'uryan ke aqab-zar ko jata hua jangal

mushkil to bahut tha magar aasan ki tarah tha

aaina-e-ashob mein dhundlaya hua 'aks

'unwan ki tarah tha kabhi imkan ki tarah tha

raushan tha 'zafar' wast mein mahtab-e-mulaqat

main chaaron taraf haala-e-hijran ki tarah tha