arz-e-hunar bhi wajh-e-shikayat ho gai

arz-e-hunar bhī vaj.h-e-shikāyāt ho ga.ī

chhoTā sā muñh thā mujh se baḌī baat ho ga.ī

dushnām kā javāb na sūjhā ba-juz-salām

zāhir mire kalām kī auqāt ho ga.ī

dekhā jo khā ke tiir kamīñ-gāh kī taraf

apne hī dostoñ se mulāqāt ho ga.ī

yā zarbat-e-ḳhalīl se but-ḳhāna chīḳh uThā

yā pattharoñ ko ma.arifat-e-zāt ho ga.ī

yārān-e-be-bisāt ki har bāzī-e-hayāt

khele baġhair haar ga.e maat ho ga.ī

be-razm din guzār liyā ratjagā manāo

ai ahl-e-bazm jaag uTho raat ho ga.ī

nikle jo mai-kade se to masjid thā har maqām

har gaam par talāfi-e-māfāt ho ga.ī

hadd-e-amal meñ thī to amal thī yahī sharāb

radd-e-amal banī to mukāfāt ho ga.ī

ab shukr nā-qubūl hai shikva fuzūl hai

jaise bhī ho ga.ī basar-auqāt ho ga.ī

vo ḳhush-nasīb tum se mulāqāt kyuuñ kare

darbān hī se jis kī mudārāt ho ga.ī

har ek rahnumā se bichhaḌnā paḌā mujhe

har moḌ par koī na koī ghaat ho ga.ī

yāroñ kī barhamī pe hañsī aa ga.ī 'hafīz'

ye mujh se ek aur burī baat ho ga.ī

arz-e-hunar bhi wajh-e-shikayat ho gai

chhoTa sa munh tha mujh se baDi baat ho gai

dushnam ka jawab na sujha ba-juz-salam

zahir mere kalam ki auqat ho gai

dekha jo kha ke tir kamin-gah ki taraf

apne hi doston se mulaqat ho gai

ya zarbat-e-KHalil se but-KHana chiKH uTha

ya pattharon ko marifat-e-zat ho gai

yaran-e-be-bisat ki har bazi-e-hayat

khele baghair haar gae mat ho gai

be-razm din guzar liya ratjaga manao

ai ahl-e-bazm jag uTho raat ho gai

nikle jo mai-kade se to masjid tha har maqam

har gam par talafi-e-mafat ho gai

hadd-e-amal mein thi to amal thi yahi sharab

radd-e-amal bani to mukafat ho gai

ab shukr na-qubul hai shikwa fuzul hai

jaise bhi ho gai basar-auqat ho gai

wo KHush-nasib tum se mulaqat kyun kare

darban hi se jis ki mudaraat ho gai

har ek rahnuma se bichhaDna paDa mujhe

har moD par koi na koi ghat ho gai

yaron ki barhami pe hansi aa gai 'hafiz'

ye mujh se ek aur buri baat ho gai