tum apne aap mein aisa karo ek rahbar paida

tum apne aap meñ aisā karo ik rāhbar paidā

kare apne tadabbur se na.ī jo rahguzar paidā

tumhāre vāste bhī koī koh-e-tūr jal jaatā

vahī zauq-e-tajassus tum bhī kar lete agar paidā

tumhārī ik sadā par koh TukḌe TukḌe ho jaa.e

karo to hausla aisā karo aisā jigar paidā

agar tum jalva-e-mahbūb ke mushtāq bante ho

to hai ye shart kar lo diid ke qābil nazar paidā

asīrān-e-qafas ḳhālī du'ā se kuchh nahīñ hogā

karo zanjīr kī āvāz se zindāñ meñ dar paidā

chaman vaale isī ko naam dete haiñ taraqqī kā

jahāñ khilte the pahle phuul hote haiñ sharar paidā

hamāre fikr-o-fan kī bhī koī qīmat ho duniyā meñ

ḳhudāvandā agar kar de koī bāliġh-nazar paidā

kisī ke dil taḌapne kī ḳhabar tum baa'd meñ pūchho

karo ai 'nūr' apnī aah meñ pahle asar paidā

tum apne aap mein aisa karo ek rahbar paida

kare apne tadabbur se nai jo rahguzar paida

tumhaare waste bhi koi koh-e-tur jal jata

wahi zauq-e-tajassus tum bhi kar lete agar paida

tumhaari ek sada par koh TukDe TukDe ho jae

karo to hausla aisa karo aisa jigar paida

agar tum jalwa-e-mahbub ke mushtaq bante ho

to hai ye shart kar lo did ke qabil nazar paida

asiran-e-qafas KHali du'a se kuchh nahin hoga

karo zanjir ki aawaz se zindan mein dar paida

chaman wale isi ko nam dete hain taraqqi ka

jahan khilte the pahle phul hote hain sharar paida

hamare fikr-o-fan ki bhi koi qimat ho duniya mein

KHudawanda agar kar de koi baaligh-nazar paida

kisi ke dil taDapne ki KHabar tum ba'd mein puchho

karo ai 'nur' apni aah mein pahle asar paida