رنج وہ کیا سبب رنج فراواں ہو جا

رنج وہ کیا سبب رنج فراواں ہو جا

حسرت وصل شریک غم ہجراں ہو جا

آدمیت سے غم ہجر کا قصہ سن لے

اے پری زاد ذرا دیر کو انساں ہو جا

خیر اقرار ستم اپنی زباں سے نہ سہی

اپنے دل میں تو ستم گار پشیماں ہو جا

رحم کر رحم اب اے بے سر و سامانیٔ عشق

تو ہی دم بھر کے لئے موت کا ساماں ہو جا

واہ کیا داد ملی ان سے پریشانی کی

ہنس کے کہتے ہیں ذرا اور پریشاں ہو جا

جان سے اپنی گزرتا ہے مریض فرقت

اب تو دم بھر کے لئے جان کے خواہاں ہو جا

راہ پر وہ بت کافر تو نہ آئے گا قمرؔ

خیر اے مرد خدا تو ہی مسلماں ہو جا