ranj wo kya sabab-e-ranj-e-farawan ho ja

ranj vo kyā sabab-e-ranj-e-farāvāñ ho jā

hasrat-e-vasl sharīk-e-ġham-e-hijrāñ ho jā

ādmiyyat se ġham-e-hijr kā qissa sun le

ai parī-zād zarā der ko insāñ ho jā

ḳhair iqrār-e-sitam apnī zabāñ se na sahī

apne dil meñ to sitamgār pashemāñ ho jā

rahm kar rahm ab ai be-sar-o-sāmānī-e-'ishq

tū hī dam bhar ke liye maut kā sāmāñ ho jā

vaah kyā daad milī un se pareshānī kī

hañs ke kahte haiñ zarā aur pareshāñ ho jā

jaan se apnī guzartā hai marīz-e-furqat

ab to dam bhar ke liye jaan ke ḳhvāhāñ ho jā

raah par vo but-e-kāfir to na āye.gā 'qamar'

ḳhair ai mard-e-ḳhudā tū hī musalmāñ ho jā

ranj wo kya sabab-e-ranj-e-farawan ho ja

hasrat-e-wasl sharik-e-gham-e-hijran ho ja

aadmiyyat se gham-e-hijr ka qissa sun le

ai pari-zad zara der ko insan ho ja

KHair iqrar-e-sitam apni zaban se na sahi

apne dil mein to sitamgar pasheman ho ja

rahm kar rahm ab ai be-sar-o-samani-e-'ishq

tu hi dam bhar ke liye maut ka saman ho ja

wah kya dad mili un se pareshani ki

hans ke kahte hain zara aur pareshan ho ja

jaan se apni guzarta hai mariz-e-furqat

ab to dam bhar ke liye jaan ke KHwahan ho ja

rah par wo but-e-kafir to na aayega 'qamar'

KHair ai mard-e-KHuda tu hi musalman ho ja