Sher on Shaheed

hai lahū shahīdoñ kā naqsh-e-jāvedāñ yaaro

maqtaloñ meñ hotī hai aaj bhī azaañ yaaro

hai lahu shahidon ka naqsh-e-jawedan yaro

maqtalon mein hoti hai aaj bhi azan yaro

zarā vo ḳhaak meñ milne na de ḳhūn-e-shahīdāñ ko

ḳhudā taufīq de itnī zamīn-e-kū-e-jānāñ ko

zara wo KHak mein milne na de KHun-e-shahidan ko

KHuda taufiq de itni zamin-e-ku-e-jaanan ko

ham ho ga.e shahīd ye e.azāz to milā

ahl-e-junūñ ko nukta-e-āġhāz to milā

hum ho gae shahid ye eazaz to mila

ahl-e-junun ko nukta-e-aghaz to mila

na intizār karo in kā ai azā-dāro

shahīd jaate haiñ jannat ko ghar nahīñ aate

na intizar karo in ka ai aza-daro

shahid jate hain jannat ko ghar nahin aate

ḳhuuñ shahīdān-e-vatan kā rañg lā kar hī rahā

aaj ye jannat-nishāñ hindostāñ āzād hai

KHun shahidan-e-watan ka rang la kar hi raha

aaj ye jannat-nishan hindostan aazad hai

lahū vatan ke shahīdoñ kā rañg laayā hai

uchhal rahā hai zamāne meñ nām-e-āzādī

lahu watan ke shahidon ka rang laya hai

uchhal raha hai zamane mein nam-e-azadi

na hogā rā.egāñ ḳhūn-e-shahīdān-e-vatan hargiz

yahī surḳhī banegī ek din unvān-e-āzādī

na hoga raegan KHun-e-shahidan-e-watan hargiz

yahi surKHi banegi ek din unwan-e-azadi

maujib-e-rañg-e-chaman ḳhūn-e-shahīdāñ niklā

maut kī jeb se bhī ziist kā sāmāñ niklā

maujib-e-rang-e-chaman KHun-e-shahidan nikla

maut ki jeb se bhi zist ka saman nikla

kin shahīdoñ ke lahū ke ye farozāñ haiñ charāġh

raushnī sī jo hai zindāñ ke har ik rauzan meñ

kin shahidon ke lahu ke ye farozan hain charagh

raushni si jo hai zindan ke har ek rauzan mein

vallāh in shahīdoñ kā me.aar dekh kar

hai marg-e-shauq aur sivā daar dekh kar

wallah in shahidon ka mear dekh kar

hai marg-e-shauq aur siwa dar dekh kar

shahīdoñ kā tire shohra zamīñ se āsmāñ tak hai

falak se balki aage baḌh ke tere āstāñ tak hai

shahidon ka tere shohra zamin se aasman tak hai

falak se balki aage baDh ke tere aastan tak hai