kis ne vafā ke naam pe dhokā diyā mujhe

kis se kahūñ ki merā gunahgār kaun hai

kis ne wafa ke nam pe dhoka diya mujhe

kis se kahun ki mera gunahgar kaun hai

maut se ziist kī takmīl nahīñ ho saktī

raushnī ḳhaak meñ tahlīl nahīñ ho saktī

maut se zist ki takmil nahin ho sakti

raushni KHak mein tahlil nahin ho sakti

zamīñ pe paañv zarā ehtiyāt se dharnā

ukhaḌ ga.e to qadam phir kahāñ sambhalte haiñ

zamin pe panw zara ehtiyat se dharna

ukhaD gae to qadam phir kahan sambhalte hain

zindagī bhar kī kamā.ī ye ta.alluq hī to hai

kuchh bache yā na bache is ko bachā rakhte haiñ

zindagi bhar ki kamai ye talluq hi to hai

kuchh bache ya na bache is ko bacha rakhte hain

vahī rishte vahī naate vahī ġham

badan se ruuh tak uktā ga.ī thī

wahi rishte wahi nate wahi gham

badan se ruh tak ukta gai thi

ik tirī yaad gale aise paḌī hai ki 'najīb'

aaj kā kaam bhī ham kal pe uThā rakhte haiñ

ek teri yaad gale aise paDi hai ki 'najib'

aaj ka kaam bhi hum kal pe uTha rakhte hain

phir yuuñ huā ki mujh pe hī dīvār gir paḌī

lekin na khul sakā pas-e-dīvār kaun hai

phir yun hua ki mujh pe hi diwar gir paDi

lekin na khul saka pas-e-diwar kaun hai

āsmānoñ se zamīnoñ pe javāb aa.egā

ek din raat Dhale yaum-e-hisāb aa.egā

aasmanon se zaminon pe jawab aaega

ek din raat Dhale yaum-e-hisab aaega

'najīb' ik vahm thā do chaar din kā saath hai lekin

tire ġham se to saarī umr kā rishta nikal aayā

'najib' ek wahm tha do chaar din ka sath hai lekin

tere gham se to sari umr ka rishta nikal aaya

mirī zamīñ mujhe āġhosh meñ sameT bhī le

na āsmāñ kā rahūñ maiñ na āsmāñ merā

meri zamin mujhe aaghosh mein sameT bhi le

na aasman ka rahun main na aasman mera

ham to samjhe the ki chāroñ dar muqaffal ho chuke

kyā ḳhabar thī ek darvāza khulā rah jā.egā

hum to samjhe the ki chaaron dar muqaffal ho chuke

kya KHabar thi ek darwaza khula rah jaega

ḳhema-e-jāñ kī tanāboñ ko ukhaḌ jaanā thā

ham se ik roz tirā ġham bhī bichhaḌ jaanā thā

KHema-e-jaan ki tanabon ko ukhaD jaana tha

hum se ek roz tera gham bhi bichhaD jaana tha

mirī numūd kisī jism kī talāsh meñ hai

maiñ raushnī huuñ añdheroñ meñ chal rahā huuñ abhī

meri numud kisi jism ki talash mein hai

main raushni hun andheron mein chal raha hun abhi

is dā.era-e-raushni-o-rañg se aage

kyā jāniye kis haal meñ bastī ke makīñ haiñ

is daera-e-raushni-o-rang se aage

kya jaaniye kis haal mein basti ke makin hain

rukūñ to hujla-e-manzil pukārtā hai mujhe

qadam uThā.ūñ to rasta nazar nahīñ aatā

rukun to hujla-e-manzil pukarta hai mujhe

qadam uThaun to rasta nazar nahin aata