na ḳhanjar uThegā na talvār in se

ye baazū mire āzmā.e hue haiñ

na KHanjar uThega na talwar in se

ye bazu mere aazmae hue hain

log kahte haiñ ki fann-e-shā.irī manhūs hai

sher kahte kahte maiñ deputy collector ho gayā

log kahte hain ki fann-e-shairi manhus hai

sher kahte kahte main deputy collector ho gaya

puurā kareñge holī meñ kyā vāda-e-visāl

jin ko abhī basant kī ai dil ḳhabar nahīñ

pura karenge holi mein kya wada-e-visal

jin ko abhi basant ki ai dil KHabar nahin

tirī tārīf ho ai sahib-e-ausāf kyā mumkin

zabānoñ se dahānoñ se takallum se bayānoñ se

teri tarif ho ai sahib-e-ausaf kya mumkin

zabanon se dahanon se takallum se bayanon se

ho ga.e raam jo tum ġhair se a jān-e-jahāñ

jal rahī hai dil-e-pur-nūr kī lanka dekho

ho gae ram jo tum ghair se a jaan-e-jahan

jal rahi hai dil-e-pur-nur ki lanka dekho