har ek baat ke yuuñ to diye javāb us ne

jo ḳhaas baat thī har baar hañs ke Taal gayā

har ek baat ke yun to diye jawab us ne

jo KHas baat thi har bar hans ke Tal gaya

maiñ to masjid se chalā thā kisī ka.aba kī taraf

dukh to ye hai ki ibādat mirī bad-nām huī

main to masjid se chala tha kisi kaba ki taraf

dukh to ye hai ki ibaadat meri bad-nam hui

kahīñ ye apnī mohabbat kī intihā to nahīñ

bahut dinoñ se tirī yaad bhī nahīñ aa.ī

kahin ye apni mohabbat ki intiha to nahin

bahut dinon se teri yaad bhi nahin aai

mire habīb mirī muskurāhaToñ pe na jā

ḳhudā-gavāh mujhe aaj bhī tirā ġham hai

mere habib meri muskurahaTon pe na ja

KHuda-gawah mujhe aaj bhi tera gham hai

zindagī ke vo kisī moḌ pe gaahe gaahe

mil to jaate haiñ mulāqāt kahāñ hotī hai

zindagi ke wo kisi moD pe gahe gahe

mil to jate hain mulaqat kahan hoti hai

ḳhushk ḳhushk sī palkeñ aur suukh jaatī haiñ

maiñ tirī judā.ī meñ is tarah bhī rotā huuñ

KHushk KHushk si palken aur sukh jati hain

main teri judai mein is tarah bhi rota hun

dil se dil nazroñ se nazroñ ke ulajhne kā samāñ

jaise sahrāoñ meñ niiñd aa.ī ho dīvānoñ ko

dil se dil nazron se nazron ke ulajhne ka saman

jaise sahraon mein nind aai ho diwanon ko

maiñ sochtā huuñ zamāne kā haal kyā hogā

agar ye uljhī huī zulf tū ne suljhā.ī

main sochta hun zamane ka haal kya hoga

agar ye uljhi hui zulf tu ne suljhai

jis taraf jaa.eñ jahāñ jaa.eñ bharī duniyā meñ

rāsta roke tirī yaad khaḌī hotī hai

jis taraf jaen jahan jaen bhari duniya mein

rasta roke teri yaad khaDi hoti hai

vaqt kī qabr meñ ulfat kā bharam rakhne ko

apnī hī laash utārī hai tumheñ kyā ma.alūm

waqt ki qabr mein ulfat ka bharam rakhne ko

apni hi lash utari hai tumhein kya malum

duur terī mahfil se raat din sulagtā huuñ

tū mirī tamannā hai maiñ tirā tamāshā huuñ

dur teri mahfil se raat din sulagta hun

tu meri tamanna hai main tera tamasha hun

qad o gesū lab-o-ruḳhsār ke afsāne chale

aaj mahfil meñ tire naam pe paimāne chale

qad o gesu lab-o-ruKHsar ke afsane chale

aaj mahfil mein tere nam pe paimane chale

dard kī baat kisī hañstī huī mahfil meñ

jaise kah de kisī turbat pe latīfa koī

dard ki baat kisi hansti hui mahfil mein

jaise kah de kisi turbat pe latifa koi

ab is ke tasavvur se bhī jhukne lagīñ āñkheñ

nazrāna diyā hai jise maiñ ne dil o jaañ kā

ab is ke tasawwur se bhi jhukne lagin aankhen

nazrana diya hai jise main ne dil o jaan ka

vo dāstāñ jo tirī dil-kashī ne chheḌī thī

hazār baar mirī sādgī ne dohrā.ī

wo dastan jo teri dil-kashi ne chheDi thi

hazar bar meri sadgi ne dohrai

ab na ka.aba kī tamannā na kisī but kī havas

ab to zinda huuñ kisī markaz-e-insāñ ke liye

ab na kaba ki tamanna na kisi but ki hawas

ab to zinda hun kisi markaz-e-insan ke liye

dil ke sunsān jazīroñ kī ḳhabar lā.egā

dard pahlū se judā ho ke kahāñ jā.egā

dil ke sunsan jaziron ki KHabar laega

dard pahlu se juda ho ke kahan jaega