aashob

abhī raat ke malgaje jism par chāñdnī kī qabā rang dikhlā rahī hai

abhī sone vāloñ ke chalte hue saañs kī narm-o-nāzuk sadā aa rahī hai

abhī tak havā khilne vaale shagūfoñ ke paaoñ se chimTī nahīñ hai

abhī āsmāñ āftāb-e-daraḳhshāñ ko parde se bāhar nahīñ lā sakā hai

magar ek TuuTā huā zard pattā

purāne daraḳhtoñ ke sūkhe hue silvaToñ se bhare jism se

yuuñ ham-āġhosh hai jaise aatā huā vaqt is ke liye hādsa ho

shāḳh se TūTnā hādsa thā

magar un purāne daraḳhtoñ ke sūkhe hue jism se dūriyoñ kā tasavvur

har ik shai se baḌh kar alam-nāk hai

purāne daraḳht ik zamāne se miTTī meñ paaoñ pasāre hue haiñ

unhoñ ne yahāñ aate jaate hazāroñ hī mausam guzāre hue haiñ

hazāroñ hī din aur hazāroñ hī rāteñ

unheñ ek jhoñke kī mānind mahsūs hotī haiñ

jo apnī ḳhushbū se mad.hosh ho

unhoñ ne ka.ī zard pattoñ kā anjām dekhā hai

aur muntazir haiñ ki ye āḳhrī zard pattā purāne daraḳhtoñ kā anjām dekhe

vo kahte haiñ

ab koī āñdhī uThe

aur hameñ zard patte kī mānind miTTī ke āġhosh se khīñch le

ab un ke qadam laḌkhaḌā.e hue haiñ

diloñ par añdhere se chhā.e hue haiñ

har ik aate lamhe ke baare meñ vo sochte haiñ

yahī āḳhrī hai

magar sub.h tak kaun jaane

ki sūraj kī pahlī shu'ā'eñ kise kaun se rang meñ dekh paa.eñ

purāne daraḳhtoñ se chimTe hue zard patte kahāñ ḳhaak uḌā.eñ

ḳhudā jaane vo lamha kab aa.e jo āḳhrī ho

abhi raat ke malgaje jism par chandni ki qaba rang dikhla rahi hai

abhi sone walon ke chalte hue sans ki narm-o-nazuk sada aa rahi hai

abhi tak hawa khilne wale shagufon ke paon se chimTi nahin hai

abhi aasman aaftab-e-daraKHshan ko parde se bahar nahin la saka hai

magar ek TuTa hua zard patta

purane daraKHton ke sukhe hue silwaTon se bhare jism se

yun ham-aghosh hai jaise aata hua waqt is ke liye hadsa ho

shaKH se TuTna hadsa tha

magar un purane daraKHton ke sukhe hue jism se duriyon ka tasawwur

har ek shai se baDh kar alam-nak hai

purane daraKHt ek zamane se miTTi mein paon pasare hue hain

unhon ne yahan aate jate hazaron hi mausam guzare hue hain

hazaron hi din aur hazaron hi raaten

unhen ek jhonke ki manind mahsus hoti hain

jo apni KHushbu se madhosh ho

unhon ne kai zard patton ka anjam dekha hai

aur muntazir hain ki ye aaKHri zard patta purane daraKHton ka anjam dekhe

wo kahte hain

ab koi aandhi uThe

aur hamein zard patte ki manind miTTi ke aaghosh se khinch le

ab un ke qadam laDkhaDae hue hain

dilon par andhere se chhae hue hain

har ek aate lamhe ke bare mein wo sochte hain

yahi aaKHri hai

magar subh tak kaun jaane

ki suraj ki pahli shu'a'en kise kaun se rang mein dekh paen

purane daraKHton se chimTe hue zard patte kahan KHak uDaen

KHuda jaane wo lamha kab aae jo aaKHri ho