aaKHri ilaj

mire lahū meñ zaḳhm hai

jo sabz hai na surḳh hai

ye giilā hai na ḳhushk hai

ki jis tarah jabīn-o-chashm meñ koī sarāb ho na aab ho

na vahshat-o-malāl ho

ki jaise ik charāġh ho bujhā bujhā jalā jalā

na dard hai na Tiis hai

ki jaise vaqt-e-jang

chashm-e-asp meñ na hairat-o-savāl ho

isī se merī zindagī

isī se sub.h-o-shām kī ye raunaq-o-shafaq bhī hai

mire tabīb kī salāh muḳhtalif

fasād-e-ḳhūn se dayār-e-jism hī bikhar gayā

charāġh-e-zaḳhm se agar navāh-e-jān zard ho gayā

bachegā kyā

ki zaḳhm se lahū hī kyā

badan ke saare 'uzv meñ

fishār-o-intishār kā hujūm-e-be-mahār jab uThegā to

dimāġh ko karegā lā-makān bhī

mirā tabīb kam paḌhā ġhabī bhī hai use ḳhabar nahīñ zarā

hakīm arastū ne kyā kahā

lahū se dil kā silsila azal se hai

lahū nahīñ to dil nahīñ jo dil nahīñ lahū nahīñ

dimāġh hukmrāñ zarūr hai

magar ye qalb-o-nūr meñ asiir hai

tabīb-e-nā-murād ne jo shaah kā ġhulām hai

bataur hukm mashvara diyā mujhe

lahū ko maiñ badan se hī nikāl duuñ

ye ġhermany kā nusḳha-e-jadīd hai

khajūr ke 'ilāqe meñ ye nusḳha kārgar huā

mere lahu mein zaKHm hai

jo sabz hai na surKH hai

ye gila hai na KHushk hai

ki jis tarah jabin-o-chashm mein koi sarab ho na aab ho

na wahshat-o-malal ho

ki jaise ek charagh ho bujha bujha jala jala

na dard hai na Tis hai

ki jaise waqt-e-jang

chashm-e-asp mein na hairat-o-sawal ho

isi se meri zindagi

isi se subh-o-sham ki ye raunaq-o-shafaq bhi hai

mere tabib ki salah muKHtalif

fasad-e-KHun se dayar-e-jism hi bikhar gaya

charagh-e-zaKHm se agar nawah-e-jaan zard ho gaya

bachega kya

ki zaKHm se lahu hi kya

badan ke sare 'uzw mein

fishaar-o-intishaar ka hujum-e-be-mahaar jab uThega to

dimagh ko karega la-makan bhi

mera tabib kam paDha ghabi bhi hai use KHabar nahin zara

hakim arastu ne kya kaha

lahu se dil ka silsila azal se hai

lahu nahin to dil nahin jo dil nahin lahu nahin

dimagh hukmran zarur hai

magar ye qalb-o-nur mein asir hai

tabib-e-na-murad ne jo shah ka ghulam hai

bataur hukm mashwara diya mujhe

lahu ko main badan se hi nikal dun

ye ghermany ka nusKHa-e-jadid hai

khajur ke 'ilaqe mein ye nusKHa kargar hua