safha number ek sau gyarah
mez ke kone par
vo chaa.e kī pyālī kā daaġh
ab lakḌī ke reshoñ meñ utar chukā hai
hamesha ke liye
āvāzeñ
ghar chhoḌ kar nahīñ jātīñ
bas kivāḌ kī darzoñ meñ chhup jaatī haiñ
yā pardoñ kī silvaToñ meñ
jaise tum
ga.e nahīñ ho
sirf us bhārī jild vaalī kitāb ke
saf.ha number ek sau gyārah ke darmiyān
mahbūs ho ga.e ho
ek zard ḳhasta pattī kī shakl meñ
jis kī ragoñ kā ḳhuun ḳhushk ho kar
bhūrā paḌ chukā hai
maiñ us kitāb ko chhūtā nahīñ
Dar lagtā hai
ki varaq palaTne kī zarā sī jumbish se
vo sūkhā huā phuul
raakh ban kar
mere haath kī lakīroñ meñ bikhar na jaa.e
mez ke kone par
wo chae ki pyali ka dagh
ab lakDi ke reshon mein utar chuka hai
hamesha ke liye
aawazen
ghar chhoD kar nahin jatin
bas kiwaD ki darzon mein chhup jati hain
ya pardon ki silwaTon mein
jaise tum
gae nahin ho
sirf us bhaari jild wali kitab ke
safha number ek sau gyarah ke darmiyan
mahbus ho gae ho
ek zard KHasta patti ki shakl mein
jis ki ragon ka KHun KHushk ho kar
bhura paD chuka hai
main us kitab ko chhuta nahin
Dar lagta hai
ki waraq palaTne ki zara si jumbish se
wo sukha hua phul
rakh ban kar
mere hath ki lakiron mein bikhar na jae
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
