shahid-e-millat-o-watan!

shahīd-e-millat-o-vatan nabī ke diiñ kī aabrū

vo sar-zamīñ mujhe haram girā jahāñ tirā lahū

vo ḳhāk-e-pāk jis ne tere ḳhuuñ se kar liyā vuzū

sadāqateñ shujā’ateñ isī se pā.eñgī numū

shahīd-e-millat-o-vatan ‘azīz-e-do-jahāñ hai tū

shahīd terī haibatoñ se maut maat khā ga.ī

hayāt tere faiz se abad kā raaz pā ga.ī

bahār-e-shauq kī fazā 'ajīb gul khilā ga.ī

adā-e-nāz-e-'āshiqī niyāz ko sikhā ga.ī

chaman ko terī aarzū chaman hai terā rang-o-bū

havas ke but-kade meñ tū ne dī hai pyaar kī azaañ

zamīr-e-lā-ilāh tere 'azm kā hai rāz-dāñ

sadā rahegī satvat-e-vatan tirī fasāna-ḳhvāñ

tire qadam kī barkateñ makāñ-makāñ zamāñ-zamāñ

na bandishoñ meñ rakh sakā tujhe jahān-e-chār-sū

gavāhī jaan de ke tū ne dī hai haq kī zaat par

chaleñge qāfile tire nishān-e-pā ko dekh kar

ġhubār-e-rah tirā hai har javāñ ko surma-e-nazar

tire charāġh se sahar kī mil ga.ī hameñ ḳhabar

nahīñ hai qaum ko ḳhatar ho laakh shorish-e-'adū

shahid-e-millat-o-watan nabi ke din ki aabru

wo sar-zamin mujhe haram gira jahan tera lahu

wo KHak-e-pak jis ne tere KHun se kar liya wuzu

sadaqaten shuja’aten isi se paengi numu

shahid-e-millat-o-watan ‘aziz-e-do-jahan hai tu

shahid teri haibaton se maut mat kha gai

hayat tere faiz se abad ka raaz pa gai

bahaar-e-shauq ki faza 'ajib gul khila gai

ada-e-naz-e-'ashiqi niyaz ko sikha gai

chaman ko teri aarzu chaman hai tera rang-o-bu

hawas ke but-kade mein tu ne di hai pyar ki azan

zamir-e-la-ilah tere 'azm ka hai raaz-dan

sada rahegi satwat-e-watan teri fasana-KHwan

tere qadam ki barkaten makan-makan zaman-zaman

na bandishon mein rakh saka tujhe jahan-e-chaar-su

gawahi jaan de ke tu ne di hai haq ki zat par

chalenge qafile tere nishan-e-pa ko dekh kar

ghubar-e-rah tera hai har jawan ko surma-e-nazar

tere charagh se sahar ki mil gai hamein KHabar

nahin hai qaum ko KHatar ho lakh shorish-e-'adu