shair ka elan-e-jang

dushman ke har ik vaar se ham baḌh ke laḌeñge

vaqt aane do aġhyār se ham baḌh ke laḌeñge

yā amn kā har mulk meñ lahrā.eñge parcham

yā jang kī talvār se ham baḌh ke laḌeñge

miT jā.eñge nāmūs-e-vatan miTne na deñge

jaise bhī ho aġhyār se ham baḌh ke laḌeñge

ham bīroñ kī aulād haiñ faulād haiñ faulād

atom ke bhī sofār se ham baḌh ke laḌeñge

jo dost bane aur kare kaam sitam kā

aise bhī sitam-gār se ham baḌh ke laḌeñge

ham kaun haiñ ham kyā haiñ batāne kī zarūrat

har quvvat-e-paikār se ham baḌh ke laḌeñge

ūñchā hai himāla se bhī kuchh 'azm hamārā

us paar bhī is paar se ham baḌh ke laḌeñge

jo kuchh bhī ho anjām magar mulk-e-vafā se

har sar-kash-o-ġhaddār se ham baḌh ke laḌeñge

bāteñ mah-o-ḳhurshīd kī haiñ dil meñ añdherā

bātin ke siyahkār se ham baḌh ke laḌeñge

ye fitna-e-chīñ kyā hai ye sarhad pe jhaḌap kyā

ab chiin kī dīvār se ham baḌh ke laḌeñge

hai qāfila-sālār vatan apnā 'javāhar'

har panja-e-ḳhūñḳhār se ham baḌh ke laḌeñge

ḳhūn-e-dil-e-'hindī' hai har ik zarra vatan kā

us ḳhuuñ ke talab-gār se ham baḌh ke laḌeñge

dushman ke har ek war se hum baDh ke laDenge

waqt aane do aghyar se hum baDh ke laDenge

ya amn ka har mulk mein lahraenge parcham

ya jang ki talwar se hum baDh ke laDenge

miT jaenge namus-e-watan miTne na denge

jaise bhi ho aghyar se hum baDh ke laDenge

hum biron ki aulad hain faulad hain faulad

atom ke bhi sofar se hum baDh ke laDenge

jo dost bane aur kare kaam sitam ka

aise bhi sitam-gar se hum baDh ke laDenge

hum kaun hain hum kya hain batane ki zarurat

har quwwat-e-paikar se hum baDh ke laDenge

uncha hai himala se bhi kuchh 'azm hamara

us par bhi is par se hum baDh ke laDenge

jo kuchh bhi ho anjam magar mulk-e-wafa se

har sar-kash-o-ghaddar se hum baDh ke laDenge

baaten mah-o-KHurshid ki hain dil mein andhera

baatin ke siyahkar se hum baDh ke laDenge

ye fitna-e-chin kya hai ye sarhad pe jhaDap kya

ab chin ki diwar se hum baDh ke laDenge

hai qafila-salar watan apna 'jawahar'

har panja-e-KHunKHar se hum baDh ke laDenge

KHun-e-dil-e-'hindi' hai har ek zarra watan ka

us KHun ke talab-gar se hum baDh ke laDenge