sab se pyara hai apna watan dosto

phuul har qism ke khil rahe haiñ yahāñ

kitnā dil-kash hai rang-e-chaman dosto

mulk duniyā meñ yuuñ to ka.ī haiñ magar

sab se pyārā hai apnā vatan dosto

sar-zamīñ hai ye chishtī mahāvīr kī

gāñdhī sardār iqbāl aur miir kī

ḳhūbiyoñ meñ ye apnī misāl aap hai

aisī koī nahīñ anjuman dosto

ādmiyyat sharāfat kā maskan hai ye

dard-mandī muravvat kā maskan hai ye

jin se shādāb rahtī hai insāniyat

hai un aqdār kā yaañ chalan dosto

pyaar se dil yahāñ sab kā sarshār hai

ye zamīñ hiir rāñjhā se gulzār hai

us kī rā'nā.iyāñ ab bhī haiñ pur-kashish

aaj bhī hai vahī bāñkpan dosto

aur bhī yuuñ zamāne meñ fankār haiñ

ḳhaas andāz ke ham parastār haiñ

rang gahrā hai hubb-e-vatan kā yahāñ

munfarid hai ye tarz-e-suḳhan dosto

phul har qism ke khil rahe hain yahan

kitna dil-kash hai rang-e-chaman dosto

mulk duniya mein yun to kai hain magar

sab se pyara hai apna watan dosto

sar-zamin hai ye chishti mahawir ki

gandhi sardar iqbaal aur mir ki

KHubiyon mein ye apni misal aap hai

aisi koi nahin anjuman dosto

aadmiyyat sharafat ka maskan hai ye

dard-mandi murawwat ka maskan hai ye

jin se shadab rahti hai insaniyat

hai un aqdar ka yan chalan dosto

pyar se dil yahan sab ka sarshaar hai

ye zamin hir ranjha se gulzar hai

us ki ra'naiyan ab bhi hain pur-kashish

aaj bhi hai wahi bankpan dosto

aur bhi yun zamane mein fankar hain

KHas andaz ke hum parastar hain

rang gahra hai hubb-e-watan ka yahan

munfarid hai ye tarz-e-suKHan dosto