jaan se pyara watan

ek rangīñ chaman hind hai dosto

jaañ se pyārā vatan hind hai dosto

shoḳh jharne kahīñ par haiñ gauhar-fishāñ

ye dil-afroz gang-o-jaman kā samāñ

ye himāla mire desh kā pāsbāñ

husn kī anjuman hind hai dosto

jaañ se pyārā vatan hind hai dosto

apnā punjab hai dil-rubā kis qadar

hai ye bangāl jaadū bharā kis qadar

hai ye kashmīr jannat-numā kis qadar

kitnā ḳhush-pairahan hind hai dosto

jaañ se pyārā vatan hind hai dosto

taaj paanī meñ jaise khilā ho kañval

Tiipū kī tarh mīnār-e-dehlī aTal

ye humakte hue parbatoñ ke mahal

jalvoñ kī anjuman hind hai dosto

jaañ se pyārā vatan hind hai dosto

raam siitā kī ye dil-nashīñ dāstāñ

chishtī gautam yahāñ aur nānak yahāñ

gāñdhī aur nehru kī mohnī hastiyāñ

the yahīñ lachhman hind hai dosto

jaañ se pyārā vatan hind hai dosto

'ġhālib'-o-'mīr'-o-'momin'-o-'zauq'-o-'zafar'

'sūr'-o-'iqbāl' 'tagore' sab haiñ amar

hai ye dhartī 'kabīr' aur 'tulsī' kā ghar

'ilm-o-fan kā gagan hind hai dosto

jaañ se pyārā vatan hind hai dosto

kitnā dil-dār hai gaañv ho yā nagar

apnī dhartī meñ poshīda lā'l-o-guhar

giit gaate haiñ ashjār shām-o-sahar

'ilm-o-fan kā gagan hind hai dosto

jaañ se pyārā vatan hind hai dosto

ek rangin chaman hind hai dosto

jaan se pyara watan hind hai dosto

shoKH jharne kahin par hain gauhar-fishan

ye dil-afroz gang-o-jaman ka saman

ye himala mere desh ka pasban

husn ki anjuman hind hai dosto

jaan se pyara watan hind hai dosto

apna punjab hai dil-ruba kis qadar

hai ye bangal jadu bhara kis qadar

hai ye kashmir jannat-numa kis qadar

kitna KHush-pairahan hind hai dosto

jaan se pyara watan hind hai dosto

taj pani mein jaise khila ho kanwal

Tipu ki tarh minar-e-dehli aTal

ye humakte hue parbaton ke mahal

jalwon ki anjuman hind hai dosto

jaan se pyara watan hind hai dosto

ram sita ki ye dil-nashin dastan

chishti gautam yahan aur nanak yahan

gandhi aur nehru ki mohni hastiyan

the yahin lachhman hind hai dosto

jaan se pyara watan hind hai dosto

'ghaalib'-o-'mir'-o-'momin'-o-'zauq'-o-'zafar'

'sur'-o-'iqbaal' 'tagore' sab hain amar

hai ye dharti 'kabir' aur 'tulsi' ka ghar

'ilm-o-fan ka gagan hind hai dosto

jaan se pyara watan hind hai dosto

kitna dil-dar hai ganw ho ya nagar

apni dharti mein poshida la'l-o-guhar

git gate hain ashjar sham-o-sahar

'ilm-o-fan ka gagan hind hai dosto

jaan se pyara watan hind hai dosto