samton ka raqs

sarsarātī huī nīlgūñ raushnī kī taraf

raushnī hī kī raftār se maiñ

safar karte karte jo daa.eñ muḌā

to mujhe yaad hai mere pahlū meñ koī sitāra nahīñ thā

ḳhalā.ī-safar kā subuk-rau farishta

mujhe apne niile paroñ par biThā kar

kisī ajnabī samt le jā rahā thā

koī abr-e-rahmat na bādal na rizvāñ

ḳhudā.ī kā sho'la na dozaḳh kā darbāñ

ki hadd-e-nazar tak

bas ik nuur kā jāduī-dā.ira thā

dhamā-dham dhamā-dham

dhamā-dham dhamā-dham

har ik zarra-e-sāz meñ shor-e-gardish bapā thā

jo samtoñ ke is raqs-e-be-ḳhud meñ

mujh ko bhī be-ḳhud kiye jā rahā thā

ye samtoñ kā jaadū hijāb-e-man-o-tū

faqat hū

faqat hū

vahāñ sail-e-duniyā yahāñ ḳhalvat-e-lā

azal se abad kī hadoñ se kahīñ duur

maiñ ūñghtī aañkh se is tamāshe meñ chehre ko sahlā rahā thā

ye vo rah-guzar thī

jahāñ se kisī āshnā ke guzarne kī ummīd kab thī

maiñ us kī haqīqat ko taslīm karne pe raazī nahīñ thā

fazāoñ meñ bikhre hue par the lekin parinde nahīñ the

uḌāneñ bas apne hī mehvar ke chāroñ taraf ghūmtī thiiñ

kahīñ kho gayā merā sī-murġh bartar

agar vo yahīñ hai

yahīñ hai kahīñ hai

mire ā.īna-ḳhāna-e-dil meñ

us kā to 'aks-e-darūñ tak nahīñ hai

maiñ vahdat huuñ kal huuñ haqīqat kā ik aa.ina huuñ

sadā jabr-e-paiham meñ raqs-e-dhamā-dham

maiñ zarra nahīñ us daraḳhshāñ fazā kā

maiñ apnī haqīqat kī pahlī nazar huuñ

maiñ ḳhud hī musāfir maiñ ḳhud hī safar huuñ

sarsaraati hui nilgun raushni ki taraf

raushni hi ki raftar se main

safar karte karte jo daen muDa

to mujhe yaad hai mere pahlu mein koi sitara nahin tha

KHalai-safar ka subuk-rau farishta

mujhe apne nile paron par biTha kar

kisi ajnabi samt le ja raha tha

koi abr-e-rahmat na baadal na rizwan

KHudai ka sho'la na dozaKH ka darban

ki hadd-e-nazar tak

bas ek nur ka jadui-daira tha

dhama-dham dhama-dham

dhama-dham dhama-dham

har ek zarra-e-saz mein shor-e-gardish bapa tha

jo samton ke is raqs-e-be-KHud mein

mujh ko bhi be-KHud kiye ja raha tha

ye samton ka jadu hijab-e-man-o-tu

faqat hu

faqat hu

wahan sail-e-duniya yahan KHalwat-e-la

azal se abad ki hadon se kahin dur

main unghti aankh se is tamashe mein chehre ko sahla raha tha

ye wo rah-guzar thi

jahan se kisi aashna ke guzarne ki ummid kab thi

main us ki haqiqat ko taslim karne pe raazi nahin tha

fazaon mein bikhre hue par the lekin parinde nahin the

uDanen bas apne hi mehwar ke chaaron taraf ghumti thin

kahin kho gaya mera si-murgh bartar

agar wo yahin hai

yahin hai kahin hai

mere aaina-KHana-e-dil mein

us ka to 'aks-e-darun tak nahin hai

main wahdat hun kal hun haqiqat ka ek aaina hun

sada jabr-e-paiham mein raqs-e-dhama-dham

main zarra nahin us daraKHshan faza ka

main apni haqiqat ki pahli nazar hun

main KHud hi musafir main KHud hi safar hun