raat ki karbala aur main

raat kī karbalā aur maiñ

ek dasht-e-abad merī taqdīr kā marhala faisle kī hadeñ

aur vo patthar se māthā lagā.e hue ḳhāmushī

haañ abad ke samundar meñ Duube hue naqsh merī virāsat nahīñ

raat kī karbalā aur maiñ

jitnī hāthoñ pe bojhal lakīreñ haiñ mere liye haiñ

magar kyā karūñ

maiñ ne us ke liye jis qadar naam DhūñDe

sabhī zang-ālūd alfāz nikle

falak kī sadāqat zamīñ kī sadāqat meñ gum ho ga.ī

āsmāñ ne muqaddas pahāḌoñ ko bosa diyā

aur duī kā nishāñ merī hastī se ruḳhsat huā

raat kī karbalā aur maiñ

aatī jaatī rutoñ kā taqāza yahī hai ki paanī se paanī judā ho

aatī jaatī rutoñ kā taqāza vahī jāntā hai

jise surḳh rangoñ meñ niile badan kī sadāqat milī

aur merā badan to havā meñ mu'allaq hai

duudh aur paanī panīr aur gandum

mirī aarzū hai

samundar samundar siyāhī bahegī

havā aur ḳhvāhish havā aur rangat

abhī raat kī karbalā mere siine pe hai

havā kā badan qāfile kā badan hai

āsmāñ aur gahre samundar kī barkāt

duudh aur paanī panīr aur gandum

mirī aarzū hai

raat ki karbala aur main

ek dasht-e-abad meri taqdir ka marhala faisle ki haden

aur wo patthar se matha lagae hue KHamushi

han abad ke samundar mein Dube hue naqsh meri wirasat nahin

raat ki karbala aur main

jitni hathon pe bojhal lakiren hain mere liye hain

magar kya karun

main ne us ke liye jis qadar nam DhunDe

sabhi zang-alud alfaz nikle

falak ki sadaqat zamin ki sadaqat mein gum ho gai

aasman ne muqaddas pahaDon ko bosa diya

aur dui ka nishan meri hasti se ruKHsat hua

raat ki karbala aur main

aati jati ruton ka taqaza yahi hai ki pani se pani juda ho

aati jati ruton ka taqaza wahi jaanta hai

jise surKH rangon mein nile badan ki sadaqat mili

aur mera badan to hawa mein mu'allaq hai

dudh aur pani panir aur gandum

meri aarzu hai

samundar samundar siyahi bahegi

hawa aur KHwahish hawa aur rangat

abhi raat ki karbala mere sine pe hai

hawa ka badan qafile ka badan hai

aasman aur gahre samundar ki barkat

dudh aur pani panir aur gandum

meri aarzu hai