bebasi

ḳhudā se 'aql na miltī to kyā paḌī thī mujhe

ki eqtidār kī niyyat kā tajziya kartā

ragoñ meñ ḳhuun kī garmī kā mo'jiza hai tamām

vagarna aadmī patthar se muḳhtalif to na thā

ye sab gudāz-e-dil-o-zehn kā natīja hai

ki 'umr bhar maiñ kisī ke liye udaas rahā

ḳhudā ne mujh ko basārat agar na dī hotī

to husn mujh pe bhalā itne hashr kyuuñ Dhātā

faqat shu'ūr-e-tanāsub hai aur jamāl hai naam

ye sirf lams kī hasrat hai varna 'ishq hai kyā

mujhe uḌaan mirī quvvat-e-ḳhayāl ne dī

vagarna merā sitāroñ se kyā ta'alluq thā

tū merī fikr meñ jalte hue alaav to dekh

burā na maan mirī tez-o-tund bātoñ kā

zabāñ milī to mujhe bolnā paḌā varna

ḳhudā kī tarh maiñ tā-roz-e-hashr chup rahtā

KHuda se 'aql na milti to kya paDi thi mujhe

ki eqtidar ki niyyat ka tajziya karta

ragon mein KHun ki garmi ka mo'jiza hai tamam

wagarna aadmi patthar se muKHtalif to na tha

ye sab gudaz-e-dil-o-zehn ka natija hai

ki 'umr bhar main kisi ke liye udas raha

KHuda ne mujh ko basarat agar na di hoti

to husn mujh pe bhala itne hashr kyun Dhata

faqat shu'ur-e-tanasub hai aur jamal hai nam

ye sirf lams ki hasrat hai warna 'ishq hai kya

mujhe uDan meri quwwat-e-KHayal ne di

wagarna mera sitaron se kya ta'alluq tha

tu meri fikr mein jalte hue alaw to dekh

bura na man meri tez-o-tund baaton ka

zaban mili to mujhe bolna paDa warna

KHuda ki tarh main ta-roz-e-hashr chup rahta