chap

yahāñ ab se kuchh der pahle

siyah zang-ālūd pahiyoñ ke rukte sañbhalte hue shor meñ

zard āvāra kutte kī āvāz

siine ke zindān ko toḌ kar

ek qaidī ke mānind bāhar ko uḌne lagī thī

vo ghāyal sisaktī huī chīḳh

ab lākhoñ kirchoñ meñ baT kar karāhoñ meñ Dhal kar

nigāhoñ ke ġhurfoñ meñ ḳhanjar chhupā.e

añdhere ke pur-haul ban kī tahoñ meñ utarne lagī hai

utartī chalī jā rahī hai

maiñ is andhī āvāz se bach nikalne kī ḳhātir

hazāroñ jatan kar chukā huuñ

dahaktī huī saañs ko apne siine meñ roke

lahū se tahī barf kī uñgliyāñ apne kānoñ meñ Thūñse

añdhere ke jangal meñ dubkā paḌā huuñ

magar kyā karūñ

is ta'āqub meñ aatī huī chaap ko kyā karūñ

yahan ab se kuchh der pahle

siyah zang-alud pahiyon ke rukte sanbhalte hue shor mein

zard aawara kutte ki aawaz

sine ke zindan ko toD kar

ek qaidi ke manind bahar ko uDne lagi thi

wo ghayal sisakti hui chiKH

ab lakhon kirchon mein baT kar karahon mein Dhal kar

nigahon ke ghurfon mein KHanjar chhupae

andhere ke pur-haul ban ki tahon mein utarne lagi hai

utarti chali ja rahi hai

main is andhi aawaz se bach nikalne ki KHatir

hazaron jatan kar chuka hun

dahakti hui sans ko apne sine mein roke

lahu se tahi barf ki ungliyan apne kanon mein Thunse

andhere ke jangal mein dubka paDa hun

magar kya karun

is ta'aqub mein aati hui chap ko kya karun