be-nishan

haañ ye sach hai tire nagar meñ jahāñ

roz chaḌhtā huā nayā sūraj

tere ūñche makān kī chhat par

jhuk ke tujh ko salām kartā hai

maiñ bhī rahtā huuñ mere hisse meñ

ik shikasta sā kulba-e-vīrāñ

merī mānind udaas aur hairāñ

merī qismat kī nā-rasā.ī thī

ki kabhī terī ik uchaTtī nazar

mere hāl-e-zabūñ pe paḌ na sakī

merī nok-e-mizha par aa na sakā

ek aañsū jo mere dil kā haal

tujh se apnī zabāñ meñ keh jaatā

'umr bhar muntazir rahā huuñ magar

us meñ Duube vo qahqahe tere

tere ūñche makāñ ke zīnoñ se

ek lamhe ko bhī utar na sake

fāsle dhaḌkanoñ ke baḌhte gaye

sadiyāñ biitī haiñ muddateñ guzrīñ

aur maiñ be-nishān nā-mā'lūm

sochtā huuñ mirī vafā kā ma.aal

merī ḳhāmoshiyoñ ke lab pe kabhī

kaash aa.e koī machaltā savāl

merī palkoñ se lauT kar koī ashk

mere ruḳhsār par Dhalak aa.e

tujh ko merā surāġh mil jaa.e

han ye sach hai tere nagar mein jahan

roz chaDhta hua naya suraj

tere unche makan ki chhat par

jhuk ke tujh ko salam karta hai

main bhi rahta hun mere hisse mein

ek shikasta sa kulba-e-viran

meri manind udas aur hairan

meri qismat ki na-rasai thi

ki kabhi teri ek uchaTti nazar

mere haal-e-zabun pe paD na saki

meri nok-e-mizha par aa na saka

ek aansu jo mere dil ka haal

tujh se apni zaban mein keh jata

'umr bhar muntazir raha hun magar

us mein Dube wo qahqahe tere

tere unche makan ke zinon se

ek lamhe ko bhi utar na sake

fasle dhaDkanon ke baDhte gaye

sadiyan biti hain muddaten guzrin

aur main be-nishan na-ma'lum

sochta hun meri wafa ka maal

meri KHamoshiyon ke lab pe kabhi

kash aae koi machalta sawal

meri palkon se lauT kar koi ashk

mere ruKHsar par Dhalak aae

tujh ko mera suragh mil jae