zaKHm-e-sahar

nā-rasā dast-e-tamannā kī tarah

surḳh hotā hai sahar kā āñchal

ajnabī mimbar-o-mehrāb-o-darīche tābāñ

sā'at-e-tāle'-e-bedār pe nāzāñ nāzāñ

apne qad se bhī zarā aur buland-o-bālā

sūraj ubhrā to jabīnoñ se kiran bhī phūTī

dhuup chamkī hai to āñgan meñ ujālā umḌā

aur kuchh duur bahut duur nahīñ

shoḳh rangīn ujāloñ ke qarīñ

kitne gahre haiñ dhūeñ ke bādal!

ham ne to phir bhī khilaunoñ se bahalnā chāhā

shahr-e-gul meñ hameñ ḳhushbu-e-vafā yaad aa.ī

arz-e-kashmīr se vietnam talak

amn ke ḳhvāb se nīpām talak

maañd paḌtī huī chehroñ kī jilā yaad aa.ī

des pardes ke zaḳhmoñ kī hinā yaad aa.ī

dil kī kyā baat sadā se pāgal

surḳh hotā hai sahar kā āñchal

na-rasa dast-e-tamanna ki tarah

surKH hota hai sahar ka aanchal

ajnabi mimbar-o-mehrab-o-dariche taban

sa'at-e-tale'-e-bedar pe nazan nazan

apne qad se bhi zara aur buland-o-baala

suraj ubhra to jabinon se kiran bhi phuTi

dhup chamki hai to aangan mein ujala umDa

aur kuchh dur bahut dur nahin

shoKH rangin ujalon ke qarin

kitne gahre hain dhuen ke baadal!

hum ne to phir bhi khilaunon se bahalna chaha

shahr-e-gul mein hamein KHushbu-e-wafa yaad aai

arz-e-kashmir se wietnam talak

amn ke KHwab se nipam talak

mand paDti hui chehron ki jila yaad aai

des pardes ke zaKHmon ki hina yaad aai

dil ki kya baat sada se pagal

surKH hota hai sahar ka aanchal