naya ahd-nama

nayā 'ahd-nāma

abhī mere ā’māq-e-jāñ meñ nihāñ hai

abhī sansanāte haiñ merī ragoñ meñ

vo alfāz jin kī hasīñ mā'naviyyat kā chehra kisī ne bhī dekhā nahīñ hai

vo alfāz jo ḳhāmushī ke añdheroñ meñ patthar haiñ lekin

agar koī mauj un ko sāhil pe laa.e

to un kī chamak motiyoñ se fuzūñ ho

na.e 'ahd-nāme kā sūraj abhī

mere ḳhuuñ kī siyah-rang gadlī sī daldal meñ uljhā huā hai

abhī us kī zard aur majrūh kirneñ

mirī be-zabānī pe nauha-kunāñ haiñ

magar us kī raushan kushāda jabīñ par

kis 'ifrīt ke nāḳhunoñ ke nishāñ haiñ

nayā 'ahd-nāma

mirī āgahī ke darīchoñ se bāhar

shagufta shagūfoñ ḳhush-āhang shāḳhoñ

shafaq-rang phūloñ meñ pattoñ meñ kaliyoñ meñ soyā huā hai

abhī us ke alfāz likkhe gaye haiñ

na aurāq-e-gul par na aurāq-e-jāñ par

abhī us kī tanzīl kā zamzama hai

na tere laboñ par na merī zabāñ par

nayā 'ahd-nāma

abhī nā-navishta sahī phir bhī us kī

'ibārāt jo mere aur tere ḳhuuñ kī

siyah-rang daldal meñ uljhī huī haiñ

dar-e-dil pe har roz detī haiñ dastak

ki ḳhvāb-e-girāñ kī ye talvār kab tak

tumheñ aur mujh ko hameñ sab ko yuuñ kāTtī hī rahegī

ye tishna balā kab talak merī aur terī

sub.hoñ kā ḳhuuñ chāTtī hī rahegī

naya 'ahd-nama

abhi mere aa’maq-e-jaan mein nihan hai

abhi sansanate hain meri ragon mein

wo alfaz jin ki hasin ma'nawiyyat ka chehra kisi ne bhi dekha nahin hai

wo alfaz jo KHamushi ke andheron mein patthar hain lekin

agar koi mauj un ko sahil pe lae

to un ki chamak motiyon se fuzun ho

nae 'ahd-name ka suraj abhi

mere KHun ki siyah-rang gadli si daldal mein uljha hua hai

abhi us ki zard aur majruh kirnen

meri be-zabani pe nauha-kunan hain

magar us ki raushan kushada jabin par

kis 'ifrit ke naKHunon ke nishan hain

naya 'ahd-nama

meri aagahi ke darichon se bahar

shagufta shagufon KHush-ahang shaKHon

shafaq-rang phulon mein patton mein kaliyon mein soya hua hai

abhi us ke alfaz likkhe gaye hain

na auraq-e-gul par na auraq-e-jaan par

abhi us ki tanzil ka zamzama hai

na tere labon par na meri zaban par

naya 'ahd-nama

abhi na-nawishta sahi phir bhi us ki

'ibaraat jo mere aur tere KHun ki

siyah-rang daldal mein uljhi hui hain

dar-e-dil pe har roz deti hain dastak

ki KHwab-e-giran ki ye talwar kab tak

tumhein aur mujh ko hamein sab ko yun kaTti hi rahegi

ye tishna bala kab talak meri aur teri

subhon ka KHun chaTti hi rahegi