ye mera shahr nahin

ye mirā shahr nahīñ

ghanTiyoñ kī vo sadā.eñ na azaañ kī āvāz

koī naġhma na koī saaz

vo parinde haiñ na ab un kī vo chahkāreñ haiñ

rāsta roktī ye kaun sī dīvāreñ haiñ

saḌkeñ vīrān havā bhī ḳhāmosh

bhūke kuttoñ kī sadā bhī ḳhāmosh

galiyāñ sunsān haiñ bāzār haiñ band

yā'nī sab ghar meñ ḳharīdār haiñ band

duudh kī fikr meñ maañ baap pareshān

bilakte bachche

kaun bhūkā hai madad kī hai zarūrat kis ko

kaun soche ki rasad kī hai zarūrat kis ko

koī aahaT na sadā

siren ḳhauf-zada kartā huā

ghar meñ jo kuchh bhī mayassar hai vahī khānā hai

television pe koī film ḳhabar serial

dekhte dekhte so jaanā hai

ye mera shahr nahin

ghanTiyon ki wo sadaen na azan ki aawaz

koi naghma na koi saz

wo parinde hain na ab un ki wo chahkaren hain

rasta rokti ye kaun si diwaren hain

saDken viran hawa bhi KHamosh

bhuke kutton ki sada bhi KHamosh

galiyan sunsan hain bazar hain band

ya'ni sab ghar mein KHaridar hain band

dudh ki fikr mein man bap pareshan

bilakte bachche

kaun bhuka hai madad ki hai zarurat kis ko

kaun soche ki rasad ki hai zarurat kis ko

koi aahaT na sada

siren KHauf-zada karta hua

ghar mein jo kuchh bhi mayassar hai wahi khana hai

telewision pe koi film KHabar serial

dekhte dekhte so jaana hai