ehtiraaz

aaj kī raat ke dāman meñ haiñ kyā kyā jaadū

ḳhvāb-ālud fazāoñ meñ ye so.e hue giit

aap ke qurb ke ehsās kī ye narm sī aañch

kisī anjān sī ḳhvāhish se sulagtā huā chāñd

kuchh jhijaktī huī sharmā.ī huī sard havā

ye mirī soch kā uljhā huā resham Dorā

nashshe meñ jhūmtī shab kī talab-angez mahak

dhaḌkanoñ ko mirī bedār kiye detī hai

dhaḌkaneñ jin kā na hāsil hai na mafhūm koī

ajnabī aap mujhe aañkh jhapak lene deñ

raat kī saañs meñ jazbāt ghule jaate haiñ

merī chorī ko magar ghuur rahī haiñ har samt

duur tak raushaniyāñ raat kī bāhoñ meñ asiir

shahr kī saḳht-o-siyah sochtī gūñgī saḌkeñ

aise jāmid haiñ ki jaise mirī qismat kī lakīr

maiñ ne maanā ki mujhe aap kuchh apne se lage

aap ke gītoñ meñ apnī mujhe āvāz aa.ī

aap ke husn-e-taḳhayyul meñ khile haiñ vo phuul

jin kī ḳhush-bū se mo'attar hai mirī tanhā.ī

phir bhī socheñ to mujhe aap se nisbat kyā hai

kachche dhāge kā ye be-nām sā ik rishta hai

ye fusūñ-kār-o-hasīñ raat faqat dhokā hai

sub.h ik aisī haqīqat hai nahīñ jis se gurez

kaun is raat ke dāman ko jakaḌ saktā hai

laakh chāheñ bhī pe ye raat guzar jā.egī

aur phir merī tamannā kī ye naurasta kalī

is haqīqat kī kaḌī dhuup na sah pā.egī

jhilmilāte haiñ jo ehsās meñ nanhe jugnū

vaqt kī aañkh meñ rah jā.eñge ban kar aañsū

raat kī raat haiñ ye raat ke saare jaadū

aaj ki raat ke daman mein hain kya kya jadu

KHwab-alud fazaon mein ye soe hue git

aap ke qurb ke ehsas ki ye narm si aanch

kisi anjaan si KHwahish se sulagta hua chand

kuchh jhijakti hui sharmai hui sard hawa

ye meri soch ka uljha hua resham Dora

nashshe mein jhumti shab ki talab-angez mahak

dhaDkanon ko meri bedar kiye deti hai

dhaDkanen jin ka na hasil hai na mafhum koi

ajnabi aap mujhe aankh jhapak lene den

raat ki sans mein jazbaat ghule jate hain

meri chori ko magar ghur rahi hain har samt

dur tak raushaniyan raat ki bahon mein asir

shahr ki saKHt-o-siyah sochti gungi saDken

aise jamid hain ki jaise meri qismat ki lakir

main ne mana ki mujhe aap kuchh apne se lage

aap ke giton mein apni mujhe aawaz aai

aap ke husn-e-taKHayyul mein khile hain wo phul

jin ki KHush-bu se mo'attar hai meri tanhai

phir bhi sochen to mujhe aap se nisbat kya hai

kachche dhage ka ye be-nam sa ek rishta hai

ye fusun-kar-o-hasin raat faqat dhoka hai

subh ek aisi haqiqat hai nahin jis se gurez

kaun is raat ke daman ko jakaD sakta hai

lakh chahen bhi pe ye raat guzar jaegi

aur phir meri tamanna ki ye naurasta kali

is haqiqat ki kaDi dhup na sah paegi

jhilmilate hain jo ehsas mein nanhe jugnu

waqt ki aankh mein rah jaenge ban kar aansu

raat ki raat hain ye raat ke sare jadu