chil

kamre kī iklautī aañkh se bāhar jhāñko

kol kī bhīgī saḌkeñ dekho

gard meñ lipTī, choroñ kī be-kal āvāz meñ

apne larazte, kāñpte hoñToñ kī āvāz milāo

dekho, bastī jaag uThī hai

shīsham kī choTī par baiThī

chiil muḌī huī choñch se apnī

uljhe pankh sañvār rahī hai

ūpar, phīke saaf falak par

chimanī kā bill khātā dhuāñ

ik dhabba ban kar jhuk sā gayā hai

dhabbe ke panjoñ se nikal kar

chīḳhte, hañste totoñ kī ik Daar, ki yak-dam saham ga.ī hai

jāmun ke ik jhunD pe gir kar ḳhatm huī hai!

tum bhī jaago

tum kyuuñ baiThe, sundar sapnoñ meñ ġhaltāñ ho

aañsū kī bārīk ridā se jhāñk ke dekho

bastī pankh sañvār rahī hai!

kamre ki iklauti aankh se bahar jhanko

kol ki bhigi saDken dekho

gard mein lipTi, choron ki be-kal aawaz mein

apne larazte, kanpte honTon ki aawaz milao

dekho, basti jag uThi hai

shisham ki choTi par baiThi

chil muDi hui chonch se apni

uljhe pankh sanwar rahi hai

upar, phike saf falak par

chimani ka bill khata dhuan

ek dhabba ban kar jhuk sa gaya hai

dhabbe ke panjon se nikal kar

chiKHte, hanste toton ki ek Dar, ki yak-dam saham gai hai

jamun ke ek jhunD pe gir kar KHatm hui hai!

tum bhi jago

tum kyun baiThe, sundar sapnon mein ghaltan ho

aansu ki barik rida se jhank ke dekho

basti pankh sanwar rahi hai!