dilip kumar

hai adākārī tirī yuuñ film meñ jaise kañval

jaise jamunā ke kināre sang-e-marmar kā mahal

hai tirā fan yuuñ jahāñ meñ jaise 'ġhālib' kī ġhazal

hai bulandī meñ himāla shaḳhsiyyat terī aTal

yuuñ hai pākīza adākārī ki jaise gangā jal

bādshāh-e-fan bhī tū hai apne fan kā hai gagan

munfarid hai shād-mānī aur alag ranj-o-suḳhan

yuuñ hai apnī zaat meñ tanhā ki jaise anjuman

razm-gāh-e-zindagī meñ zindagī hai shāndār

har adākārī meñ terī shaḳhsiyat hai pur-vaqār

jagmagā.e film jugnū jvaar bhāTā devdās

aan meñ kyā shaan hai dīdār meñ āñkheñ udaas

''madhumatī'' paiġhām meñ sangharsh meñ nikhrī hai yaas

muġhal-e-ā’zam kī kahānī zindagī par chhā ga.ī

gangā jamnā gaañv kī achchhī chhavī dikhlā ga.ī

film industries kā anmol hai tū koh-e-nūr

jis ne bhī āzād dekhā dekhā saudāgar zarūr

terī filmoñ kā diloñ par ab bhī qaa.em hai surūr

shāh-kār-e-fan kaheñ jo film hai terī shahīd

paikar-e-ġham hai kabhī tū aur kabhī tasvīr-e-'īd

ye sunā hai dil saḳhī hai ye bhī ḳhū achchhī lagī

ahl-e-fan se jab bhī kī hai guftugū achchhī lagī

tere gulzār-e-adab ke gul kī bū achchhī lagī

de ga.e tujh ko du'ā ye hazrat-e-raghupati-sahā.e

terī shohrat kā ye sūraj tā-qayāmat jagmagā.e

hai adakari teri yun film mein jaise kanwal

jaise jamuna ke kinare sang-e-marmar ka mahal

hai tera fan yun jahan mein jaise 'ghaalib' ki ghazal

hai bulandi mein himala shaKHsiyyat teri aTal

yun hai pakiza adakari ki jaise ganga jal

baadshah-e-fan bhi tu hai apne fan ka hai gagan

munfarid hai shad-mani aur alag ranj-o-suKHan

yun hai apni zat mein tanha ki jaise anjuman

razm-gah-e-zindagi mein zindagi hai shandar

har adakari mein teri shaKHsiyat hai pur-waqar

jagmagae film jugnu jwar bhaTa dewdas

aan mein kya shan hai didar mein aankhen udas

madhumati paigham mein sangharsh mein nikhri hai yas

mughal-e-a’zam ki kahani zindagi par chha gai

ganga jamna ganw ki achchhi chhawi dikhla gai

film industries ka anmol hai tu koh-e-nur

jis ne bhi aazad dekha dekha saudagar zarur

teri filmon ka dilon par ab bhi qaem hai surur

shah-kar-e-fan kahen jo film hai teri shahid

paikar-e-gham hai kabhi tu aur kabhi taswir-e-'id

ye suna hai dil saKHi hai ye bhi KHu achchhi lagi

ahl-e-fan se jab bhi ki hai guftugu achchhi lagi

tere gulzar-e-adab ke gul ki bu achchhi lagi

de gae tujh ko du'a ye hazrat-e-raghupati-sahae

teri shohrat ka ye suraj ta-qayamat jagmagae