ek sham

dekh phir aaj bhī is nagrī meñ

shaam kī kirneñ tere saath chalī haiñ

tere saath chalī haiñ

dekh ab kahīñ kahīñ in lambī laal lavoñ kī laḌiyāñ mailī dhuup meñ bujh ke

rastoñ se paivast paḌī haiñ

kahīñ kahīñ ye zard sulagte tīkhe baan diloñ meñ chubh kar TuuT ga.e haiñ

āsmān se le kar sat.h-e-zamīñ tak

har sū phail ga.ī haiñ laakh ḳharāsheñ

dukhtī ḳharāsheñ gahrī uljhī huī lahrīlī

pighlī huī be-jism salāḳheñ patlī patlī piilī piilī

dekh ab in sayyāl salāḳhoñ kī chamkīlī baaḌh ye jitne phuul the un ko

toḌ ke le ga.e be-sudh jhoñke

baaqī sirf ik sard siyāh uljhāv

bujhtī huī ik saañs ke qaidī

dekh ab tere sāmne haiñ vo saare sard siyāh zamāne

jin ke bhañvar meñ tere diip kī lau us vaqt se larzāñ hai

pahlā sūraj sadiyoñ pahle jab tire dil meñ Duubā thā

dekh phir aaj bhi is nagri mein

sham ki kirnen tere sath chali hain

tere sath chali hain

dekh ab kahin kahin in lambi lal lawon ki laDiyan maili dhup mein bujh ke

raston se paiwast paDi hain

kahin kahin ye zard sulagte tikhe ban dilon mein chubh kar TuT gae hain

aasman se le kar sath-e-zamin tak

har su phail gai hain lakh KHarashen

dukhti KHarashen gahri uljhi hui lahrili

pighli hui be-jism salaKHen patli patli pili pili

dekh ab in sayyal salaKHon ki chamkili baDh ye jitne phul the un ko

toD ke le gae be-sudh jhonke

baqi sirf ek sard siyah uljhaw

bujhti hui ek sans ke qaidi

dekh ab tere samne hain wo sare sard siyah zamane

jin ke bhanwar mein tere dip ki lau us waqt se larzan hai

pahla suraj sadiyon pahle jab tere dil mein Duba tha