samaji tanhai

ek chhoTī sī Dibiyā meñ ham ne khilaunoñ kī duniyā basā.ī

vo duniyā ki jis meñ

mahāfil kī raunaq

sarāboñ ke manzar

ravābit ke jhūle

dikhāve kī ḳhushiyāñ thiiñ armān the

al-ġharaz dil ke bahlāne ko saare sāmān the

apnī taḳhlīq-karda ye duniyā hameñ itnī dil-kash lagī

is meñ jaane kā ham ne irāda kiyā

aur ḳhud ko bahut muḳhtasar kar liyā

apnī ḳhamdār gardan liye

ham sarāboñ meñ dāḳhil hue

to khilaunoñ ke jhurmaT meñ gum ho gaye

aaj rishtoñ ke Dhāñche

gharoñ meñ paḌe muntazir haiñ hamāre

ki ham lauT aa.eñ

to jazboñ kī hiddat se un ko na.ī zindagī mil sake

shahr suune paḌe haiñ

faqat saa.e chal-phir rahe haiñ

vo saa.e jo ik dūsre se guzar jaate haiñ

aur ulajhte nahīñ

mausamoñ kī udāsī

guzarte hue vaqt kī rā.igānī

hameñ DhūñDtī hai

ki ham lauT aa.eñ

to rūThī huī ye fazā.eñ zarā muskurā.eñ

magar ham to ḳhud-sāḳhta ek mub.ham samājī shikanje meñ jakḌe hue

aise resham ke kirmak

jo apne hī atrāf ko.e banā kar

usī ḳhol meñ

'umr bhar ke liye

qaid ho jaate haiñ

dā.imī ġhaflatoñ kī ghanī niiñd so jaate haiñ

ek chhoTi si Dibiya mein hum ne khilaunon ki duniya basai

wo duniya ki jis mein

mahafil ki raunaq

sarabon ke manzar

rawabit ke jhule

dikhawe ki KHushiyan thin arman the

al-gharaz dil ke bahlane ko sare saman the

apni taKHliq-karda ye duniya hamein itni dil-kash lagi

is mein jaane ka hum ne irada kiya

aur KHud ko bahut muKHtasar kar liya

apni KHamdar gardan liye

hum sarabon mein daKHil hue

to khilaunon ke jhurmaT mein gum ho gaye

aaj rishton ke Dhanche

gharon mein paDe muntazir hain hamare

ki hum lauT aaen

to jazbon ki hiddat se un ko nai zindagi mil sake

shahr sune paDe hain

faqat sae chal-phir rahe hain

wo sae jo ek dusre se guzar jate hain

aur ulajhte nahin

mausamon ki udasi

guzarte hue waqt ki raigani

hamein DhunDti hai

ki hum lauT aaen

to ruThi hui ye fazaen zara muskuraen

magar hum to KHud-saKHta ek mubham samaji shikanje mein jakDe hue

aise resham ke kirmak

jo apne hi atraf koe bana kar

usi KHol mein

'umr bhar ke liye

qaid ho jate hain

daimi ghaflaton ki ghani nind so jate hain