nae devta

samundar kī gahrā.iyoñ se ubhartā

kisī zard ḳhurshīd kā sard saaya

qadīm āstānoñ ke vīrāñ khañDar meñ

shab-e-tīrgī kā nayā hukm jaarī

jhuke shahr-e-ḳhāmosh par bhīgtī shab

kisī būḌhe sāhir kī sūrat khaḌī hai

na koī sadā hai na koī bashar hai

hameñ āgahī ke sarāboñ ne gherā

salīboñ pe laTke hue ḳhvāb-e-ādam

ye bedār zehnoñ kā ik suunā sahrā

na koī masīhā na koī payambar

sanam-ḳhāna-e-'aql kī jāliyoñ se

na.e devtā ab nikalne ko aa.e

samundar se lipTā hai sahrā kā dāman

phir is pyaas kā dā.ira ban rahā hai

samundar ki gahraiyon se ubharta

kisi zard KHurshid ka sard saya

qadim aastanon ke viran khanDar mein

shab-e-tirgi ka naya hukm jari

jhuke shahr-e-KHamosh par bhigti shab

kisi buDhe sahir ki surat khaDi hai

na koi sada hai na koi bashar hai

hamein aagahi ke sarabon ne ghera

salibon pe laTke hue KHwab-e-adam

ye bedar zehnon ka ek suna sahra

na koi masiha na koi payambar

sanam-KHana-e-'aql ki jaliyon se

nae dewta ab nikalne ko aae

samundar se lipTa hai sahra ka daman

phir is pyas ka daira ban raha hai