nai nasl ka jadu

'ajab log haiñ ye

ki sab se alag zindagānī kā ādarsh inheñ raas aayā

magar ye haqīqat bhī sab par 'ayāñ hai

inheñ baat karne kā koī salīqa nahīñ hai

to aao

zarā ham nipaTne chaleñ in ke afkār-e-nau se

ye rasta baḌā sahl bhī hai kaThin bhī

ki jis ke sire par

koī aisī manzil nahīñ

ham pahuñch kar jahāñ

paaoñ kī gard ko jhaaḌ kar keh sakeñ

surḳh-rū ho ga.e haiñ

ki is raah kī āḳhrī had koī bhī nahīñ

sirf saa.e haiñ aapas meñ dast-o-garebāñ

har ādarsh shāyad ġhalat hai ye samjho

ki ham ḳhud ko bahlāne kī aaḌ meñ jaadū Tone ko sach jaan kar

muskurāte haiñ dil maiñ

magar ye samajh lā.eñge ham kahāñ se

ki ik din achānak

ye jaadū bhī apnā asar tyaag degā

'ajab log hain ye

ki sab se alag zindagani ka aadarsh inhen ras aaya

magar ye haqiqat bhi sab par 'ayan hai

inhen baat karne ka koi saliqa nahin hai

to aao

zara hum nipaTne chalen in ke afkar-e-nau se

ye rasta baDa sahl bhi hai kaThin bhi

ki jis ke sire par

koi aisi manzil nahin

hum pahunch kar jahan

paon ki gard ko jhaD kar keh saken

surKH-ru ho gae hain

ki is rah ki aaKHri had koi bhi nahin

sirf sae hain aapas mein dast-o-gareban

har aadarsh shayad ghalat hai ye samjho

ki hum KHud ko bahlane ki aaD mein jadu Tone ko sach jaan kar

muskuraate hain dil main

magar ye samajh laenge hum kahan se

ki ek din achanak

ye jadu bhi apna asar tyag dega