kargil

ḳhāmosh hai vaadī koī āvāz nahīñ hai

jo hausla detā thā vahī saaz nahīñ hai

maañ rotī hai ab us ko koī kaise sañbhāle

āñkhoñ ke diye bujh ga.e ai god ke paale

sarhad pe na aañch aane dī aise the jiyāle

hañstā thā jo kal aaj vo jāñbāz nahīñ hai

ḳhāmosh hai vaadī koī āvāz nahīñ hai

āġhāz meñ anjām kā Dar un ko nahīñ thā

raste meñ koī ḳhauf-o-ḳhatar un ko nahīñ thā

Dar marne kā daurān-e-safar un ko nahīñ thā

anjām se achchhā yahāñ āġhāz nahīñ hai

ḳhāmosh hai vaadī koī āvāz nahīñ hai

vīroñ ke bichhaḌ jaane se har aañkh hai pur-nam

sarhad ke javānoñ kā har ik ghar meñ hai mātam

maañ bahnoñ kī āñkhoñ ke diye ho ga.e maddham

ab dil ke dhaḌakne kā vo andāz nahīñ hai

ḳhāmosh hai vaadī koī āvāz nahīñ hai

kyā 'azm thā kis 'azm se vo jang laḌe the

dushman kī taraf josh meñ har lamha baḌhe the

lahrāne tirangā vahī choTī pe chaḌhe the

us 'azm se ūñchī koī parvāz nahīñ hai

ḳhāmosh hai vaadī koī āvāz nahīñ hai

tum viir the aur viir kabhī mar nahīñ saktā

jo kaam kiyā tum ne koī kar nahīñ saktā

yuuñ maut kā dāman to koī bhar nahīñ saktā

dushman ko mayassar bhī ye andāz nahīñ hai

ḳhāmosh hai vaadī koī āvāz nahīñ hai

har ek javāñ laḌne ko tayyār hai ab to

har dil meñ nayā jazba-e-paikār hai ab to

sīnoñ meñ dhaḌaktī na.ī jhankār hai ab to

kyā apne shahīdoñ kā ye e'jāz nahīñ hai

ḳhāmosh hai vaadī koī āvāz nahīñ hai

KHamosh hai wadi koi aawaz nahin hai

jo hausla deta tha wahi saz nahin hai

man roti hai ab us ko koi kaise sanbhaale

aankhon ke diye bujh gae ai god ke pale

sarhad pe na aanch aane di aise the jiyale

hansta tha jo kal aaj wo jaanbaz nahin hai

KHamosh hai wadi koi aawaz nahin hai

aaghaz mein anjam ka Dar un ko nahin tha

raste mein koi KHauf-o-KHatar un ko nahin tha

Dar marne ka dauran-e-safar un ko nahin tha

anjam se achchha yahan aaghaz nahin hai

KHamosh hai wadi koi aawaz nahin hai

wiron ke bichhaD jaane se har aankh hai pur-nam

sarhad ke jawanon ka har ek ghar mein hai matam

man bahnon ki aankhon ke diye ho gae maddham

ab dil ke dhaDakne ka wo andaz nahin hai

KHamosh hai wadi koi aawaz nahin hai

kya 'azm tha kis 'azm se wo jang laDe the

dushman ki taraf josh mein har lamha baDhe the

lahrane tiranga wahi choTi pe chaDhe the

us 'azm se unchi koi parwaz nahin hai

KHamosh hai wadi koi aawaz nahin hai

tum wir the aur wir kabhi mar nahin sakta

jo kaam kiya tum ne koi kar nahin sakta

yun maut ka daman to koi bhar nahin sakta

dushman ko mayassar bhi ye andaz nahin hai

KHamosh hai wadi koi aawaz nahin hai

har ek jawan laDne ko tayyar hai ab to

har dil mein naya jazba-e-paikar hai ab to

sinon mein dhaDakti nai jhankar hai ab to

kya apne shahidon ka ye e'jaz nahin hai

KHamosh hai wadi koi aawaz nahin hai