ek ghair-alamti nazm

adhūrī laḌkiyo

tum apne kamroñ meñ purāne saal ke bosīda calender sajā kar sochtī ho

ye badan umroñ kī sāzish meñ na ā.eñge

tumheñ kis ne batāyā hai

ghaḌī kī sūiyoñ ko rokne se dauḌtā aur hāñptā sūraj misāl-e-naqsh-e-pā

aflāk par jam jā.egā

tumheñ ma.alūm hai uryāniyoñ ko Dhāñp kar tum aur uryāñ ho rahī ho

roz in āñkhoñ kī tikḌī meñ tumhāre jism tulte haiñ

har ik shab hostel meñ taash kī baazī meñ tum ko jiit kar ik jashn hotā hai

hamārī ḳhvāb-gāhoñ meñ tumhāre ḳhvāb raushan haiñ

chalī aao

ki bāhar barf hai

aur ab hameñ tum se judā bistar kahāñ taslīm karte haiñ

chalī aao ki umreñ rā.egāñ hone se bach jā.eñ!

adhuri laDkiyo

tum apne kamron mein purane sal ke bosida calender saja kar sochti ho

ye badan umron ki sazish mein na aaenge

tumhein kis ne bataya hai

ghaDi ki suiyon ko rokne se dauDta aur hanpta suraj misal-e-naqsh-e-pa

aflak par jam jaega

tumhein malum hai uryaniyon ko Dhanp kar tum aur uryan ho rahi ho

roz in aankhon ki tikDi mein tumhaare jism tulte hain

har ek shab hostel mein tash ki bazi mein tum ko jit kar ek jashn hota hai

hamari KHwab-gahon mein tumhaare KHwab raushan hain

chali aao

ki bahar barf hai

aur ab hamein tum se juda bistar kahan taslim karte hain

chali aao ki umren raegan hone se bach jaen!