marg-e-mahtab
zamīñ ne mahtāb maar Daalā kabhī na ab vo tulū' hogā
kabhī na aa.egī chāñdnī shab
na rat-jagoñ ke hasīn mele kabhī lageñge
ki ab to mahtāb mar chukā hai
chalo bas ab chal ke tīrgī meñ
diloñ ke maddham diye jalā.eñ sunā.eñ biite dinoñ ke qisse
kitāb-e-chāhat kī āyatoñ ko paḌheñ sahar tak
ki rūh-e-mah ko savāb pahuñche bache jahannam kī kulfatoñ se
hudūd-e-jannat meñ jagmagā.e 'urūj dekhe
zamīñ kī ḳhātir bhī sab ḳhudā se gunah kī baḳhshish zarūr māñgeñ
ki apne bachche ko qatl kar ke vo tā-qayāmat na hañs sakegī
na ab koī apnī kokh se vo hasīn mahtāb jan sakegā
ki pahle bachche ko qatl kar ke
ḳhudā kī nazroñ se gir ga.ī hai
zamīñ ne mahtāb maar Daalā kabhī na ab vo tulū' hogā
bas ab añdherā rahegā har-sū kabhī na aa.egī chāñdnī-shab
na ratjagoñ ke hasīn mele kabhī lageñge
zamīn kaalī qabā meñ lipTī hamesha mātam-kunāñ rahegī
zamin ne mahtab mar Dala kabhi na ab wo tulu' hoga
kabhi na aaegi chandni shab
na rat-jagon ke hasin mele kabhi lagenge
ki ab to mahtab mar chuka hai
chalo bas ab chal ke tirgi mein
dilon ke maddham diye jalaen sunaen bite dinon ke qisse
kitab-e-chahat ki aayaton ko paDhen sahar tak
ki ruh-e-mah ko sawab pahunche bache jahannam ki kulfaton se
hudud-e-jannat mein jagmagae 'uruj dekhe
zamin ki KHatir bhi sab KHuda se gunah ki baKHshish zarur mangen
ki apne bachche ko qatl kar ke wo ta-qayamat na hans sakegi
na ab koi apni kokh se wo hasin mahtab jan sakega
ki pahle bachche ko qatl kar ke
KHuda ki nazron se gir gai hai
zamin ne mahtab mar Dala kabhi na ab wo tulu' hoga
bas ab andhera rahega har-su kabhi na aaegi chandni-shab
na ratjagon ke hasin mele kabhi lagenge
zamin kali qaba mein lipTi hamesha matam-kunan rahegi
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.