sipiyan

samundar ke kināre sīpiyāñ chunte hue bachche

kuchh aise dekhte haiñ apnī apnī jholiyoñ ko

jaise baniye

gāhakoñ kī jeb se nikle hue paisoñ ko gin kar

apne dil meñ sochte haiñ

naf'andozī meñ koī un kā ham-pesha paḌosī

un se bhī aage mubādā baḌh gayā ho

aur phir is dauḌ meñ

har ek baniyā chāhtā hai

jis tarah bhī ho vo apne kār-o-bār-e-naf'-andozī kī manzil par pahuñch kar

apne pīchhe aane vaale rāhiyoñ par muskurā.e

apnī jebeñ khankhanā.e

aur phir bhūkī tijorī kī taraf lapke

aur us ke peT meñ bhar de sunahre qahqahe

vo qahqahe

jo āñsuoñ ke ek be-pāyāñ samundar kī tahoñ se

sīpiyāñ ban ban ke aate haiñ kināre par

jinheñ bharne ko aa jaate haiñ apnī apnī jholī meñ

samundar ke kināre sīpiyāñ chunte hue bachche

samundar ke kinare sipiyan chunte hue bachche

kuchh aise dekhte hain apni apni jholiyon ko

jaise baniye

gahakon ki jeb se nikle hue paison ko gin kar

apne dil mein sochte hain

naf'andozi mein koi un ka ham-pesha paDosi

un se bhi aage mubaada baDh gaya ho

aur phir is dauD mein

har ek baniya chahta hai

jis tarah bhi ho wo apne kar-o-bar-e-naf'-andozi ki manzil par pahunch kar

apne pichhe aane wale rahiyon par muskurae

apni jeben khankhanae

aur phir bhuki tijori ki taraf lapke

aur us ke peT mein bhar de sunahre qahqahe

wo qahqahe

jo aansuon ke ek be-payan samundar ki tahon se

sipiyan ban ban ke aate hain kinare par

jinhen bharne ko aa jate hain apni apni jholi mein

samundar ke kinare sipiyan chunte hue bachche